Заря
  • Рус Тат
  • “Безне, егетләрне, онытты фетнәле Әфган...”

    Совет гаскәрләрен Әфганстаннан чыгаруның 25 еллыгы алдыннан район мәдәният йортында ул еллар вакыйгаларында катнашкан алексеевскилылар җыелды.

    Фойеда ветераннар чәй өстәле янында истәлекләре белән уртаклаштылар һәм тыныч тормыш турында сөйләштеләр. Бу кичәдә залда чечен компаниясендә катнашучылар, "әфганлы"лар гаиләләре, кадет сыйныфлары укучылары, җәмәгатьчелек вәкилләре катнашты. Барысы өчен дә эчкерсез программа әзерләнгән иде, ул беркемне дә битараф калдырмады. Әфганстандагы сугыш хәрәкәтләрендә катнашкан егетләрнең берсенең җанга үтеп керердәй шигырьләреннән күп кенә тамашачыларның күзләрендә яшьләр күренде. "Элита" хореография студиясе артистлары башкарган кызлар биюе егетләре сугышта булган кәләшләрнең күңел кичерешләрен күрсәтте. Ә Иван Крашенинников башкаруында Владимир Высоцкийның "Он не вернулся из боя" исемле җырыннан соң тамакка төер утырды. Ә инде концерт программасында иң моңсу мизгел Әфганстанда һәм Чечняда һәлак булган егетләрнең хатларын уку булды. Аларда әле сау-сәламәт һәм киләчәккә өмет белән караучы якташларыбыз үзләренең солдат тормышларын сурәтлиләр, хезмәт иткәннән соң тормышка планнар коралар... Аларны, шулай ук яу кырыннан әйләнеп кайта алмаган барлык егетләрне тамашачылар бер минут тын торып искә алдылар.


    Сугышчы-интернационалистларны бәйрәм белән котлап, район башлыгы Владимир Козонков, Әфганстан һәм Чечня ветераннары һәм инвалидлары советы рәисе Николай Гордеев, ветераннар советы рәисе Шамил Мөлеков, район хәрби комиссары Дмитрий Дерунов Ватан алдында үтәгән бурычлары өчен рәхмәт әйттеләр, аларга сәламәтлек һәм иминлек теләделәр. Әфганстанда сугышучыларга алар "Әфганстанда СССР Хәрби Көчләренең сугышчан бурычларын үтәгән өчен" истәлекле медале, рәхмәт хатлары һәм грамоталар тапшырдылар.


    Шулай ук катнашучыларның барысы да Бөек Ватан сугышы елларында һәлак булган якташларыбызны да хөрмәтләп искә алдылар, Мәңгелек ут янына чәчәкләр куйдылар.


    Ә кич белән район башлыгының чакыруы буенча һәм Гөлнур Сафинаның матди ярдәмендә Әфганстанда һәм Төньяк Кавказдагы сугыш хәрәкәтләрендә катнашучылар "Оазис"та җыелдылар, анда аралашуларын рәсми булмаган шартларда дәвам иттерделәр.

    Нравится
    Поделиться:
    Реклама
    Комментарии (0)
    Осталось символов: