Ветераннарны җыр-биюләр белән котладылар

Бөек Җиңү көне алдыннан хөрмәтле якташларны район башлыгы Сергей Демидов котлады. Котлауларны һәм бүләкләрне Бөек Ватан сугышында катнашучылар Анатолий Сергеевич Мухин, Александр Андреевич Смелов һәм тыл хезмәтчәне Шәмсигаян Галләм кызы Мортазина кабул иттеләр.

Ветераннар өчен сугыш чоры җырлары яңгырады. Йортлар ишегалларында ук район мәдәният йортының иҗат коллективы ветераннар өчен тере аккомпанемент белән импровизацияләнгән концерт оештырды.

Строй һәм җыр смотры

Алексеевск районында Җиңү көнен бәйрәм итү строй һәм җыр смотрыннан башланды. Ветераннарны мәктәп һәм колледж укучылары, балалар бакчасында тәрбияләнүчеләр, Әфганстан һәм Чечня сугыш хәрәкәтләрендә катнашучылар, яшьармиячеләр, Эчке эшләр бүлеге, Гадәттән тыш хәлләр министрлыгының хезмәт коллективлары сәламләде. Хезмәтләре бүген дә алыштыргысыз һәм мактаулы булган шәфкать туташлары аерым строй белән үтте.

Хәрби техника парады

Алексеевскида беренче тапкыр хәрби техника парады узды. Ветераннар алдында легендар «Катюша», «Урал», броневиклар, БМП, Газ-69 һәм башка хәрби техника берәмлекләре узды. «Мотобратия во Христе» мотоциклчылары стройны төгәлләде. Бу районның күркәм традициясенә әверелсен иде!

Митинг

Тантаналы митингта район башлыгы Сергей Демидов ветераннарга барлык алексеевскилылар исеменнән рәхмәт сүзләре белән мөрәҗәгать итте. «Сугыштан соңгы дүрт буын сезнең батырлык, Җиңү хакына гомерләрен кызганмаган солдатларның батырлыгы, тыл хезмәтчәннәренең фидакяр хезмәте нәтиҗәсендә тыныч һәм тату яшиләр. Җиңү көне - илебезнең һәр гаиләсе өчен зур бәйрәм. Зур рәхмәт сезгә, кадерле ветераннар, сезгә нык сәламәтлек, иминлек һәм бәхет телим». Татарстан Республикасы Президенты Рөстәм Миңнеханов исеменнән Татарстан Республикасының Биологик ресурслар буенча дәүләт комитеты рәисе Федор Батков котлавын җиткерде. «Ватанны саклаучыларның бердәм сафларында җиде йөз меңнән артык якташыбыз батырларча көрәште, аларның яртысыннан артыгы яу кырында ятып калды, лагерьларда һәлак булды һәм госпитальләрдә яралардан үлде. Бу якты көндә без һәлак булган геройлар һәм сугыш корбаннары алдында баш иябез, тыл хезмәтчәннәренә хөрмәтебезне белдерәбез.

Кадерле ветераннарыбызга чын күңелдән озын гомер һәм иминлек, барлык татарстанлыларга – чиста күк йөзе, бәхет, сәламәтлек, хезмәттә һәм укуда уңышлар телим!» - дип язылган котлауда.

Театр куелышы

Район мәдәният йортында «Подранки» хәрби спектакле күрсәтелде. «Радужная фантазия» театр студиясе актерлары тамашачыларны сугыш чорына кертеп җибәрде, сугыш чоры балаларының кайгысына чумдырды.

Сугыш ачысын күреп белмәүче дүртенче буын үсеп килә. Аларның Бөек Ватан сугышы тарихын яхшы үзләштерүе бездән, зурлардан тора, безнең бабаларыбыз сугышта катнашканнар һәм тылда Җиңүне якынайтканнар. «Подранки» спектакле сугыш чоры балаларының фаҗигасе турында тарих буенча теләсә кайсы китаптан да яхшырак сөйли. Бу спектакльне барлык мәктәп укучылары һәм студентлар күрергә тиеш. Истә тоту өчен. Белү өчен.

Халык күңел ачулары

Чиркәү мәйданында традицион кичке концерт узды. Аның алдыннан театр прологы булып узды. Масштаблы спектакль районның иҗат коллективларын һәм аграр колледж студентларын берләштерде. Бәйрәм кичәсе салют белән тәмамланды