Игелекле Яңа ел алды эшләре

Узган ике атнада мондый ярдәмне район инвалидлары оешмалары һәм 205 гаилә алды.

1 декабрьдән 10 декабрьгә кадәр бара торган инвалидлар ункөнлеге кысаларында инвалидларга Татарстан Республикасы Дәүләт Советы депутаты Алексей Демидов 170 данә Яңа ел пакетына акча бирде. Шулай ук хәерчелек чигендә яшәүче 30 гаиләгә "Эдем"ЧҖҖ дан (җитәкчесе Гөлнур Сафина) азык-төлек пакетлары китерделәр. Өч өй хуҗасына "Алексеевск керамикасы"ААҖдан (Рәмис Кәбиров) газ өчен бурычларын түләүгә акча бүленде.

Күп балалы бер гаилә "Асылбикә" ЧҖҖдан (Рамил Әхмәтҗанов) - электр үткәргечен алмаштыруга, икенче гаилә "Элита" ЧҖҖдан (Юрий Белов) кышкы киемнәр сатып алуга ярдәм алды.

Рәхмәтле кешеләр иганәчеләрне якынлашып килүче Яңа ел белән котлыйлар, аларга сәламәтлек, эшләрендә уңышлар телиләр.

Газета редакциясе дә мохтаҗларга ярдәм кулы сузган бөтен кешегә алексеевскилылар юллаган иң яхшы теләкләргә кушыла һәм рәхмәт әйтү өчен сәбәпләр булыр әле, дип ышанып кала.