Җәй матур булып истә калсын

Чыгарылыш сыйныф укучыларын алда имтиханнар һәм яңа тормыш этабы көтә, ә мәктәп балалары өчен озак көтелгән җәйге каникуллар башланды. Аларны саф һавада йөрүләр, сәяхәтләр, дуслар белән очрашулар һәм ял көтә.

Җәй һәрвакыт үзгә кәеф белән килә. Кояшта җылынган үлән исе, кичке саф һавада йөрүләр, тәрәзә артындагы яңгыр тавышы һәм алда әле күпме җылы көннәр, бәхетле мизгелләр булу хисе белән.

Ләкин ял белән беррәттән иминлек турында да онытмаска кирәк. Өлкәннәр балаларга юлда, суда, урманда һәм велосипедта яки самокатта йөргәндә үз-үзеңне тоту кагыйдәләрен искә төшерә. Гади игътибарлылык һәм саклык җәйне матур гына түгел, ә чыннан да хәвефсез итәргә ярдәм итә.

Ә тагын җәй – ул тормышны бераз әкренрәк темпта яшисе, тирә-якны күбрәк күрәсе һәм гади нәрсәләргә шатланасы килә торган вакыт.

Һичшиксез, таңны каршы алырга вакыт табыгыз. Һичьюгы бер генә тапкыр бик иртә уянып, табигатьнең ничек уянуын, кырлар өстеннән кояш күтәрелүен һәм һаваның иртәнге сафлык белән тулуын күрегез.

Балыкка барыгыз – тотым өчен түгел, ә тынлык, тыныч су өсте һәм күңелдән сөйләшүләр өчен.

Кич белән таныш урамнар буйлап велосипедта йөреп килегез, «Гаилә» паркына керегез, «Юлчы» паркында йөрегез яки җылы җәйге кичләрдә аеруча рәхәт булган яңа «Ёлки-Палки» паркында ял итегез.

Җәй көне табигатьтә ешрак буласы килә. Гаилә белән ял итү өчен Биләрнең «Тәвә кошлары» эко-фермасы да яхшы урын булырга мөмкин. Анда балалар да, өлкәннәр дә кызыклы итеп вакыт үткәрә ала.

Елгада яки күлдә коеныгыз, эссе көндә суның салкынлыгын һәм башка бернәрсә белән дә чагыштырып булмый торган җәйге ирек хисен тоегыз.

Җиләк җыегыз, кыр чәчәкләре өзегез яки урман сукмагыннан гына йөреп кайтыгыз. Нигәдер нәкъ менә шундый гади мизгелләр хәтердә аеруча озак саклана.

Алексеевск районында яшәүче Валентина Ивановна елмаеп болай дип искә ала:

– Элек җәй бөтенләй башкача үтә иде. Иртәннән кичкә кадәр урамда була идек: ел-гада коендык, велосипедта йөрдек, җиләк җыйдык, кичкә кадәр уйнадык. Һәм бәхет өчен ул чакта бик аз гына кирәк иде.

Ә мәктәп укучысы Артём иң нык дуслары белән вакыт үткәрүне көтүен әйтә:

– Җәй көне күбрәк йөрисе, велосипедта йөрисе һәм авылдагы әби янында ял итәсе килә. Анда һәрвакыт аеруча рәхәт.

Учак янында кич үткәрегез. Кайнар чәй, көлдә пешкән бәрәңге, күңелле сөйләшүләр һәм баш өстендәге йолдызлы күк белән.

Һичьюгы берникадәр вакытка телефонны читкә куегыз һәм ашыкмыйча, өзлексез хәбәрләрсез бер көн үткәрегез. Чын җәй барыбер экранда түгел, ә безнең янәшәдә үтә.

Яңа нәрсә эшләп карагыз – кечкенә сәяхәткә чыгып китегез, яңа шөгыль башлап җибәрегез яки элек вакыт җитмәгән эшне эшләгез.

Гаиләгез һәм якыннарыгыз белән күбрәк вакыт үткәрегез. Нәкъ менә шундый кичләр, уртак сәяхәтләр һәм гади сөйләшүләр соңыннан иң кадерле истәлекләргә әверелә.

Һәм иң мөһиме – үзегезгә җәйдән ләззәт алырга мөмкинлек бирегез. Матур кояш баешларын, яңгырдан соңгы хуш исне, яфраклар шавын һәм тормышны тәшкил иткән бәхетле мизгелләрне күрергә өйрәнегез.

Бу җәй яхшы, җылы һәм чын күңелдән бәхетле булсын.