Бакчачылыкта күчемсез милекне ничек рәсмиләштерергә: дип аңлата Росреестр

Нинди документлар кирәк һәм милекне гадиләштерелгән тәртиптә рәсмиләштереп буламы — дип аңлата Росреестрның Татарстан Республикасы буенча Алексеевск, Әлки һәм Спас районнары буенча идарәсенең муниципальара бүлеге башлыгы Илсур Кәлимуллин.

 Бакча йорты: милек хокукын ничек теркәргә

Әгәр җир кишәрлеге хосусыйлаштырылган, ә анда бакча йорты урнашкан икән, аны кадастр исәбенә куярга һәм милек хокукын теркәргә кирәк. Моның өчен милекчегә объектның техник планын әзерләү өчен кадастр инженерына мөрәҗәгать итәргә кирәк.

Әзер документлар пакетын Татарстан Республикасы Росреестрына күпфункцияле үзәк аша йә электрон рәвештә — Росреестрның рәсми сайтындагы Шәхси кабинет аша көчәйтелгән квалификацияле электрон имза булганда тапшырырга мөмкин.

Бакча һәм дача кишәрлекләрендә урнашкан башка күчемсез милек объектлары да шундый ук тәртип буенча рәсмиләштерелә: мунчалар, гаражлар, хуҗалык корылмалары.

Бакчачының әгъзалык кенәгәсе буенча җирне рәсмиләштереп буламы

Еш кына гражданнар бакчачылык ширкәтләрендәге җир кишәрлекләреннән дистә еллар буе файдаланалар, кулларында бакчачының әгъзалык кенәгәсе генә була. Әмма, Илсур Кәлимуллин ассызыклаганча, әгъзалык кенәгәсе хокук билгеләүче документ булып тормый һәм милек хокукын дәүләт теркәвенә алу өчен нигез була алмый.

Шул ук вакытта законда җирне рәсмиләштерүнең гадиләштерелгән тәртибе каралган. 2031 елның 1 мартына кадәр бакчачылык ширкәтенең теләсә кайсы әгъзасы кишәрлек урнашкан урын буенча Башкарма комитетка мөрәҗәгать итәргә һәм җир кишәрлеген милеккә бушлай бирү турында карар алырга хокуклы.

Шуннан соң әлеге карарны тапшырып һәм 700 сум күләмендә дәүләт пошлинасын түләп, Росреестрга мөрәҗәгать итәргә кирәк.

«Дача амнистиясе»буенча нәрсә рәсмиләштерергә мөмкин

«Дача амнистиясе» кысаларында торак пунктлар чикләрендә бакчачылык, индивидуаль торак төзелеше, шәхси ярдәмче хуҗалык алып бару өчен, шулай ук крестьян (фермер) хуҗалыклары эшчәнлеге өчен бирелгән җир кишәрлекләрендә урнашкан торак һәм бакча йортларын гадиләштерелгән тәртиптә теркәү рөхсәт ителә.

Шул ук вакытта торак йортлар ИЖС объекты параметрларына туры килергә тиеш: аларның биеклеге 20 метрдан артмаска тиеш, җир өсте катларының саны — өчтән артмаска тиеш. Бина яшәү һәм гражданнарның көнкүреш ихтыяҗларын канәгатьләндерү өчен каралган булырга тиеш.