Чәчүгә әзерләр диярлек

Комиссия әгъзалары Алексеевскиның сигез хуҗалыгында булды. Әзерлек сызыгына куелган тракторлар, чәчү комплекслары, башка тагылма инвентарь чәчүнең якынлашуын күрсәтте, техника һәм кешеләрнең алда торган эшләргә әзерлеген тикшерәсе генә калды.

- Тикшерү барышында, - ди баш инженер Юрий Михайлов, - чәчүгә техниканың әзерлегеннән тыш, Татарстан Республикасы Авыл хуҗалыгы министрлыгы боерыгы белән расланган бәяләү күрсәткечләре нигезендә авыл хуҗалыгы машиналарының барлык төрләрен агрегатлаштыру, хезмәтне саклау буенча технологияләрне үтәү сыйфаты, эшче планнарының, орлыклык материалның булуы, ындыр табагы хуҗалыгының әзерлеге бәяләнде. Хуҗалыкларның әзерлек дәрәҗәсе кырык баллы система буенча билгеләнде. Иң күп баллны "Биләр" авыл хуҗалыгы предприятиесе "эшләп алды", икенче урын хаклы рәвештә "Сөт иле" ЧҖҖның "Ясная поляна" (Кыркүл бүлекчәсе) филиалына бирелде. Әйтергә кирәк, "Сөт иле" ЧҖҖның "Рассвет" бүлекчәсе хезмәт коллективы кыр эшләренә тулысынча әзер, анда техника ремонтлау төгәлләнгән инде. "Кызыл Шәрык"ның "Көньяк Алексеевск" филиалында ремонтланган техника күрсәтүгә куелган. Шулай ук зур булмаган хуҗалыклар - "Уку хуҗалыгы" һәм "Хәмитов Р.М."ның зур булмаган хуҗалыклары кырга чыгарга әзерләр. "Алга" һәм "Родина" күмәк хуҗалыклары да булган авыл хуҗалыгы техникасының бөтен җыелмасын тәкъдим иттеләр.

Тикшерүгә йомгак ясап, "Татагропром"ААҖның авыл хуҗалыгы производствосы бүлеге начальнигы Илдар Әфләтунов, Алексеевск районы хуҗалыклары кыр эшләрен үткәрүгә әзерләр һәм аларга куелган бурычларны үтисе генә калды, дип сүзен йомгаклады.

Сүз уңаеннан әйткәндә

Ил һәм республика Хөкүмәте быел да авыл кешеләренә ярдәм күрсәтте. Мәсәлән, федераль бюджеттан кыр эшләрен үткәрүгә - 18 млн. сум, республика бюджетыннан 43 млн. сум акча бүлеп бирелде. Район хуҗалыкларына 2,5 мең тоннадан артык минераль ашлама кайтарылды. Моннан тыш, алар үзләренең кондицияле орлыклык материаллары белән тулысынча тәэмин ителделәр. Дизель ягулыгына килгәндә, аны ташламалы бәягә Чистай нефть базасыннан авыл хуҗалыгы предприятиеләре сатып ала.