Халык уеннары һәм җырлары белән узган чыгарылыш кичәсе

«Яшь армияче» бинасы янындагы үзәк мәйдан берничә сә-гатькә очрашулар, ис-тәлекләр, музыка һәм җанлы аралашу урынына әйләнде.

Быел Биләр мәктәбе 14 унберенче сыйныф һәм 20 тугызынчы сыйныф укучысын олы тормышка озата. Балалар өчен бу көн мәктәп тормышы, дуслар һәм туган авылның гадәти мохите белән символик саубуллашу булды.

Авыл халкы һәм кунаклар өчен бай программа әзерләнгән иде. Мәйданда фотозоналар эшләде, район мәдәният йортының «Духов день» ансамбле һәм «Млада» вокал коллективы башкаруында җырлар яңгырады. Бәйрәмнең иң матур өлешләренең берсе булып халык уеннары һәм биюләре торды. Аларда балалар һәм яшьләр генә түгел, өлкәннәр дә бик теләп катнашты.

– Биләр өчен мондый бәйрәмнәр аеруча зур әһәмияткә ия. Алар буыннар бәйләнешен, безнең традицияләрне һәм авыл тарихын сакларга ярдәм итә. Авыл халкының программада кызыксынып катнашуы, яшьләрнең халык уеннарына һәм аралашуга актив кушылуы бик сөендерә, – дип билгеләп үтте Биләр авыл җирлеге башлыгы Александр Рузанов.

Кунакларның аерым игътибарын Биләрнең тарихи өлеше буенча үткәрелгән туган якны өйрәнү экскурсиясе җәлеп итте. Аны «Яшь армияче» клубы директоры Андрей Чугуров алып барды. Экскурсия вакытында катнашучыларга борынгы авыл тарихы, танылган якташлар һәм истәлекле урыннар турында сөйләделәр.

Чараның аерым өлеше булып авыл халкы һәм чыгарылыш сыйныф укучы-ларының мәктәп еллары, яраткан укытучылары һәм Биләрдәге тормыш турында истә-лекләрен яздыру торды. Күпләр өчен бу балачак һәм яшьлекнең иң җылы мизгелләрен яңадан искә төшерү мөмкинлеге булды.

Бәйрәм чын күңелдән, җылы рухта узды һәм авыл халкы өчен төрле буын вәкилләре янәшә җыела торган мондый уртак чараларның никадәр мөһим булуын тагын бер кат күрсәтте.