Алексеевск районының баш дәүләт инженер-инспекторы югары бүләккә лаек булды

Татарстан Республикасы Алексеевск районы буенча дәүләт техника күзәтчелеге бүлегенең баш дәүләт инженер-инспекторы Әгъләм Гариф улы Тукмаков 2026 елның 11 февралендә Казан Экспода узган ТР дәүләт техника күзәтчелеге идарәсенең йомгаклау коллегиясендә катнашты.

Утырыш ведомствоның 2025 елдагы эшчәнлегенә йомгак ясауга һәм 2026 елга төп бурычларны билгеләүгә багышланган иде. Коллегия эшендә республика министрлыклары һәм ведомстволары вәкилләре, профильле структуралар җитәкчеләре һәм территориаль бүлекчәләр белгечләре катнашты. Катнашучылар контроль-күзәтчелек эшчәнлеге нәтиҗәләре, техниканы теркәү күрсәткечләре, шулай ук мәҗбүри таләпләрне бозуларны кисәтү мәсьәләләре турында фикер алышты.

Дәүләт хезмәтләре күрсәтүнең сыйфатын яхшыртуга, гражданнар һәм юридик затлар белән эшне камилләштерүгә аерым игътибар бирелде.

Һөнәри эшчәнлекләрендә югары нәтиҗәләргә ирешкән хезмәткәрләрне бүләкләү тантанасы чараның үзенчәлекле мизгеленә әверелде.

ТР агросәнәгать комплексы системасында намуслы һәм нәтиҗәле хезмәте өчен Әгъләм Гариф улы Тукмаков ТР Премьер-министры урынбасары – ТР авыл хуҗалыгы һәм азык-төлек министры Марат Җәббаровның Рәхмәт хаты белән бүләкләнде. Аңа шулай ук истәлеккә кул сәгате бүләк ителде.

Бу бүләк — Алексеевск муниципаль районы территориясендә дәүләт техник күзәтчелеген гамәлгә ашыру, үзйөрешле машиналарның һәм башка төр техниканың торышын контрольдә тоту буенча җаваплы һәм системалы эшне тану. Техниканың төзеклеген тәэмин итү агросәнәгать комплексының эксплуатация куркынычсызлыгына һәм эш нәтиҗәлелегенә турыдан-туры йогынты ясый, дип билгеләп үтелде утырышта.

Коллегия нәтиҗәләре буенча 2026 елга идарә эшчәнлегенең өстенлекле юнәлешләре билгеләнде, алар арасында күзәтчелек процессларын санлаштыру, профилактик эшнең нәтиҗәлелеген арттыру һәм ведомствоара хезмәттәшлекне үстерү. Заманча мәгълүмат системаларын гамәлгә кертү, авыл хуҗалыгы товар җитештерүчеләренә консультация ярдәмен киңәйтү һәм мәҗбүри таләпләрне үтәү буенча аңлату эшләрен көчәйтү планлаштырыла.