Татарстанда тернәкләндерүнең техник чараларына 1 500 электрон сертификат рәсмиләштерелгән

Фондның электрон каталогында 740 җитештерүче һәм тәэмин итүчедән 6,9 меңнән артык тернәкләндерү эшләнмәсе күрсәтелгән. Анда техник чараларның бәяләрен, шулай ук түләү өчен электрон сертификатларны кабул итүче кибетләрнең адресларын табарга мөмкин. Исемлек һәрвакыт киңәя.

       Сертификатта аның ярдәмендә сатып алырга мөмкин  булган эшләнмәнең төре турында мәгълүмат бар. Бу ишетү аппараты, кресло-коляска, култык таягы, таяк –  гомумән, закон кысаларында  каралган теләсә кайсы  эшләнмә  булырга мөмкин. Сертификатта шулай ук аның гамәлдә булу вакыты турында да мәгълүмат язылган: хәзер ул 12 ай тәшкил итә, әмма бу вакыт инвалидлыгы булган кешене индивидуаль реабилитация программасы нигезендә  реабилитацияләү өчен күрсәтелгән сроктан артык була алмый.

       Сертификатта шулай ук аның ярдәмендә сатып алырга мөмкин булган тернәкләндерү эшләнмәләренең саны һәм өстәмә акча кулланмыйча гына сертификат белән түләргә мөмкин булган техник реабилитацияләү чарасының максималь бәясе язылган.

        Электрон сертификат  гадәти банк картасы кебек үк  эшли:  сайлап алынган товар өчен шунда ук  сертификаттан файдаланып түләргә мөмкин. Сертификаттан эквайрингка тоташкан яки маркетплейсларда урнаштырылган офлайн-кибетләрдә яки сәүдә-сервис предприятиеләрендә дә файдаланырга була.

       Социаль фондның шәхси кабинетында яки Дәүләт хезмәтләре порталында  сертификатны рәсмиләштерергә, аны алырга һәм кирәкле тернәкләндерү чарасына заказ бирергә мөмкин.

       Электрон сертификат тернәкләндерүнең техник чаралары белән тәэмин итүнең гамәлдәге ысулларын тулыландыра гына, димәк, моңа кадәр гамәлдә булган чаралар барысы да үз көчендә кала.