Алексеевск районына мобиль поликлиника килде

Биләр авыл җирлегендә яшәүчеләр атна дәвамында тулы комплекслы тикшеренүләр үтә һәм төрле белгечләргә күренә алды. Аерым кабинетларда невролог, эндокринолог, кардиолог, ревматолог, гинеколог, онколог һәм офтальмолог кабул иттеләр. Шулай ук ультратавыш тикшерүе узарга һәм кирәкле анализларны лабораториядә тапшырырга мөмкин иде.
Мобиль поликлиника барлык кирәкле техника белән җиһазландырылган: компьютерлар, җәелмәле өстәлләр, ятаклар һәм аппаратура.
«Безгә биредә кирәкле белгечләрне узу мөмкинлеге бирелүенә бик шатмын. Бу бик уңайлы, беркая да барырга кирәкми, зур чиратлар юк», - дип уртаклаша поликлиника пациентлары.
Кабул итү район үзәк хастаханәсе белән җирле участок табиблары төзегән һәм килешегән исемлекләр буенча уза. Мобиль поликлиниканың килүе турында пациентларга алдан хәбәр иттеләр.
Мобиль комплекс мөдире Илфак Ярмиев сөйләвенчә, мобиль поликлиника тагын 3 атна эшләячәк, бу вакыт эчендә белгечләр Алексеевск районының берничә торак пунктында булачак: Зур Тигәнәле, Сахаровка, Юеш Көрнәле. Һәр авылда алар бер атна торачак. Бу вакыт эчендә барлык пациентлар да кирәкле белгечләргә барырга өлгерәчәк.
Мобиль поликлиникаларда авыл халкын медицина тикшерүе «Сәламәтлек саклау» һәм «Демография» милли проектларын гамәлгә ашыру кысаларында үткәрелә. Мобиль поликлиниканың төп максаты - авыруларны һәм куркыныч факторларны башлангыч стадиядә ачыклау.