Алимент түләмәгән өчен ирегеннән мәхрүм ителде

Алексеевск районы прокуратурасында хәбәр итүләренчә, хатын-кыз Россия Федерациясе Җинаять кодексының 157 нче маддәсе 1 нче өлеше — балигъ булмаган балаларны карап тоту өчен акчаларны кабат-кабат түләмәү — буенча гаепле дип табылды.

Суд тарафыннан ачыкланганча, моңа кадәр гаепләнүче алимент түләмәгән өчен Россия Федерациясе Административ хокук бозулар кодексының 5.35.1 маддәсе 1 нче өлеше буенча административ җаваплылыкка тартылган булган. Әмма ул тиешле нәтиҗәләр ясамаган һәм үзенең өч балигъ булмаган баласын карап тоту өчен акча түләүдән кабат качкан.

Нәтиҗәдә алиментлар буенча бурыч барлыкка килгән, аның гомуми күләме 1 миллион 400 мең сумнан артык тәшкил иткән.

Дәүләт гаепләүчесе позициясен исәпкә алып, суд хатын-кызга 10 айга ирегеннән мәхрүм итү җәзасы билгеләде. Җәзаны ул гомуми режимдагы төзәтү колониясендә үтәячәк.

Хөкем карары законлы көченә керде.