Ныклы гаиләләр – Алексеевск районының горурлыгы

Еллар узгач та мәхәббәтне саклап калырга нәрсә ярдәм итә? Тормыш авырлыкларына, мәшәкатьләргә һәм көндәлек ыгы-зыгыга карамастан, гаиләне нәрсә ныклы итә?

Бу сорауга бер генә җавап та юк. Кемдер өчен гаилә бәхете ышанычтан башлана, кемдер аны үзара хөрмәттә һәм юл куя белүдә күрә, ә кайберәүләр өчен иң мөһиме – һәрвакыт янәшә булу һәм бер-береңә терәк булу

Без озак еллар бергә гомер иткән район гаиләләре белән очраштык. Аларның һәркайсының тарихы үзенчә, әмма һәркайсы ихлас мәхәббәт, якыннарга булган кайгырту һәм еллар узса да үз кыйммәтен югалтмаган гади тормыш хакыйкатьләре белән сугарылган.

Фоминнар гаиләсе: «Бәхет хөрмәттән башлана»

Александр белән Надежда Фоминнарның мәхәббәт тарихы 2014 елда башлана. Ул вакытта Надежда педагогика көллиятенең беренче курсында укый, ә Александр «Алексеевскдорстрой» җәмгыятендә эшли. Яшьләр таныша һәм шул көннән башлап диярлек аерылмыйлар. Бергә хыялланалар, киләчәккә планнар коралар һәм вакыт узу белән ныклы гаилә төзергә теләүләрен аңлыйлар.

2017 елда өйләнеш-кәннән соң алар Алексеевскига күченеп килә. Александр элеккечә «Алексе-евскдорстрой»да хезмәтен дәвам итә, ә Надежда «Әтәчкәй» балалар бакчасында тәрбияче булып эшли башлый. Бүген алар өч бала – уллары Роман белән Артёмны һәм озак көтеп алынган кызлары Таисияне тәрбиялиләр.

Фоминнар фике-ренчә, ныклы гаилә ачык аралашуга, үзара хөрмәткә һәм уртак хыялларга нигезләнә.

– Иң мөһиме – сөйләшү генә түгел, ә бер-береңне чын күңелдән ишетү. Якын кешеңнең фикерен хөрмәт итәргә, аны һәрчак хупларга, кечкенә генә гаилә шатлыкларына да сөенә белергә һәм мөмкин кадәр ешрак бергә вакыт үткәрергә кирәк.

Фоминнар гаилә-сендә балалар аеруча яраткан матур традиция бар. Ел саен алар бергәләп Кыш бабайга хат язалар, аннан соң бөтен гаилә белән Яңа ел могҗизасын көтәләр. Алар фикеренчә, нәкъ менә шундый мизгелләр балачакның иң кадерле хатирәләре булып кала.

Гаиләнең иң зур шатлыгы – үз йортларына күченү. Алар бу хыялга озак еллар буе бергәләп килгәннәр.

Яшь гаиләләргә Александр белән Надежда бер-берсен кадерләргә һәм бәхетле гаиләнең нигезе үзара хөрмәт булуын беркайчан да онытмаска киңәш итәләр.

Гаилә бәхетенең сере: «Хөрмәт, ышаныч, бер-береңә инану һәм мәхәббәт».

Филичкиннар гаиләсе: «Иң мөһиме – бер-береңә терәк булу»

Евгений белән Ольга Филичкиннарның мәхәббәт тарихы егерме елга якын элек башлана. Аларның язмышларын очраштырган урын – Мәңгелек ут янында була. Ул чакта Алексеевск яшьләре район мәдәният йортындагы дискотекалар алдыннан шунда җыела торган булган. Берничә очрашу ныклы дуслыкка, ә соңрак мәхәббәткә әверелә. Алты ел дәвамында яшьләр очрашып йөриләр, киләчәккә планнар коралар, бер-берсен аңларга өйрәнәләр һәм тормышның беренче сынауларын бергә үтәләр.

Бүген инде алар ундүртенче ел бәхетле гаилә булып яшиләр һәм өч бала тәрбиялиләр. Өлкән кызлары Полина балалар сән-гать мәктәбенең рәсем бүлегендә шө-гыльләнә. Кристина бию белән мавыга һәм район мәдәният йорты сәхнәсендә чыгыш ясый. Ә иң кечесе – биш яшьлек Арсений – актив һәм кызыксынучан малай булып үсә.
 – Без бер-беребезне генә түгел, бала-ларыбызның һәр башлангычын да хупларга тырышабыз. Чөнки алар – безнең дәвамыбыз, – диләр алар.

Гаиләнең иң яраткан традицияләренең берсе – җәйге сәяхәтләр. Ел саен Филичкиннар балаларына Татарстанның һәм Россиянең яңа почмакларын күрсәтергә тырышалар, туган илнең матурлыгын бергәләп ачалар һәм уртак бәхетле хатирәләр туплыйлар.

Яшь гаиләләргә алар иң элек бер-берсен тыңлый белергә киңәш итәләр.
 – Берсе ишетмәсә, икенчесе сөйләмәсә, ныклы гаилә булмый. Бер-береге-зне яратыгыз һәм сезнең дәвамыгыз – балаларыгыз икәнен онытмагыз.
 
 Гаилә бәхетенең сере: «Һәрчак бер-береңә терәк булу».

Кудряшовлар гаиләсе: «Кырык алты ел – кулга-кул тотынып»

Николай Петрович белән Вера Владимировна Кудряшовларның мәхәббәт тарихы совет чорындагы матур фильмнардагы кебек башланган. Ул вакытта егетләр дә, кызлар да аерым компанияләр белән йөргән, әмма очраклы бер очрашу аларның бөтен язмышын үзгәрткән.
 
 Шул кичтә Вера артыннан өч егет йөри. Алар арасында Николай да була. Кызны күргәч, ул: «Бу минем хатыным булачак», – ди һәм аны өенә кадәр озатып куярга тәкъдим итә. Икенче көнне үк Вера янына мотоцикл белән килә. Алар тиздән тормыш юлларын бергә үтәргә карар итәләр.

Августта алар туй үткәрәләр. Бер елдан соң өлкән уллары Максим туа, өч елдан – Павел. Вера Владимировна озак еллар сатучы булып эшли, ә Николай Петрович район спорт комитетын җитәкли. Күп еллар дәвамында Кудряшовлар гаиләсендә матур традицияләр барлыкка килгән. Һәр Яңа елны һәм туган көннәрне алар зур гаилә белән каршы алалар. Хәзер инде бер табын артына уллары, киленнәре, оныгы һәм өч оныкчыгы җыела. Мондый очрашулар алар өчен аеруча кадерле, чөнки нәкъ менә шунда гаилә тарихы дәвам итә һәм традицияләр киләсе буыннарга күчә.

Тагын бер матур гадәт бар. Николай Петрович инде күп еллар дәвамында һәр язны һәм җәй буе, кыр һәм урман чәчәкләре беткәнче, хатынына кечкенә генә чәчәк бәйләме алып кайта. Вера Владимировна өчен бу чәчәкләр – еллар узса да сүрелмәгән мәхәббәтнең иң кадерле билгесе. Ул нәкъ менә шушы гади игътибар билгеләрен гаилә бәхетенең төп серләренең берсе дип саный.

Яшь гаиләләргә алар ашыкмаска киңәш итәләр.

– Бер-берегездән барысын да шунда ук таләп итмәгез. Бер-берегезне аңларга өйрәнегез, гаилә тормышын бергәләп корыгыз, киңәшләшеп һәм ярдәмләшеп яшәгез. Шул чакта һәр авырлыкны җиңеп булачак.

Гаилә бәхетенең сере: «Үзара ярдәм, аңлашу һәм хөрмәт».

Өч гаиләнең тормыш юлы төрле. Берсе – егерме елга якын, икенчесе – унбер ел, өченчесе инде кырык алты ел иңгә-иң куеп яши. Әмма аларның тарихларын тыңлагач, шуны аңлыйсың: чын гаилә матур сүзләрдән дә, зур бүләкләрдән дә тормый. Аны көндәлек кайгырту, хөрмәт, бер-береңне ишетә белү, авыр чакта терәк булу һәм гади мизгелләргә сөенә белү тудыра.

Шуңа күрә гаилә бәхетенең уртак формуласы юктыр, мөгаен. Һәр гаилә аны үзе таба – мәхәббәттән, ышанычтан, сабырлыктан, уртак хатирәләрдән һәм тормыш юлын кулга-кул тотынып үтү теләгеннән.
 
 

Ә Алексеевск районында гаилә тра-дицияләрен кадерләп саклаучы, балаларын мәхәббәт мохитендә тәрбияләүче һәм үз үрнәге белән яшь буынга иң мөһим кыйммәтләрне күрсәтүче шундый гаиләләр яшәгәндә, гаилә кыйммәтләре җәмгыятебезнең ныклы нигезе булып калачак.