30 елдан артык хезмәт: Алексеевскның ихлас табибы

Зәйнәп Гыйльман кызы 1936 елның 18 гыйнварында Чистай районының Татар Ялтаны авылында туа, биредә мәктәптә укый һәм аны уңышлы тәмамлый. Сәүдә техникумында белем алгач, ул сатучы булып эшли башлый. Ләкин әнисе каты авырап китү сәбәпле, Зәйнәп Гыйльман кызы үзен медицинага багышларга карар кыла. Мәктәптән соң алты еллык тәнәфес булуга карамастан, ул имтиханнарны «бик яхшы» билгеләренә тапшыра һәм Казан медицина институтына укырга керә.

Медицина институтында белем алган вакытта аның әнисе үлә, ләкин барлык авырлыкларны җиңеп, Зәйнәп Гыйльман кызы укуын тәмамлый. 1969 елда направление буенча ул Алексеевск бистәсенә җибәрелә, биредә педиатр буларак табиблык практикасын башлый. Алга таба ул табиб-инфекционист һәм дерматолог-венеролог белгечлекләрен ала, берьюлы ике җирдә, поликлиникада һәм стационарда эшли.

Ул үзенең язмышын шулай ук Алексеевскига направление буенча җибәрелгән Николай Петрович Харитонов белән бәйли, аның хатыны үлгән һәм ул өч баласы белән бер ялгызы калган була. Зәйнәп Гыйльман кызы алар өчен кайгыртучан әнигә әверелә, соңрак гаиләдә уртак кызлары Лилия туа.

Зәйнәп Гыйльман кызы 30 елдан артык гомерен кешеләргә хезмәт итүгә багышлый, ул намуслы, җаваплы һәм сизгер табиб була. Авыру ирен карарга кирәк булу сәбәпле, аңа хезмәт эшчәнлеген тәмамларга туры килә.

Бүгенге көндә Зәйнәп Гыйльман кызы үзәк район хастаханәсе коллективы һәм райондашлары арасында хөрмәткә лаек кеше. Аның алты оныгы һәм унөч оныкчыгы бар, алар аның тормыш юлы һәм кешелек сыйфатлары белән горурлана.