32 ел балалар сәламәтлеге өчен: Ольга Демидова юбилеен билгеләп үтте

Аның исеме алексеевскилыларның берничә буыны өчен шәфкатьлелек һәм профессиональлек символына әверелде. Ольга Владимировна 1955 елның 4 маенда Казанда туа. 1979 елда Казан медицина институтын тәмамлагач, ул үзен медицинаның иң катлаулы һәм җаваплы өлкәләренең берсе булган педиатриягә багышлый. Аның карьерасы Лаеш хастаханәсендә башлана, ә берничә елдан ул Алексеевск үзәк район хастаханәсенең әйдәп баручы белгече була. 32 ел эшләү дәверендә Ольга Владимировна участок табибыннан балалар бүлеге мөдире дәрәҗәсенә кадәр үсеп, профессионализмның чын үрнәгенә әверелде. Аның хезмәте күп бүләкләргә лаек булды, алар арасында «Татарстан Республикасының атказанган табибы» исеме һәм Сәламәтлек саклау министрлыгының Мактау грамоталары бар.

Күп кенә хезмәттәшләре өчен Ольга Владимировна яхшы дус кына түгел, ә иң авыр мизгелләрдә илһамландырган һәм ярдәм иткән кеше булды. Рафаэль Риф улы Гайсин, табиб-педиатр: «Ольга Владимировна белән мин күп еллар эшләдем. Институтны тәмамлагач, районыбызга кайттым. Ул вакытта хастаханәдә өч педиатр иде. Мин — кичәге студент, ә бүген врач-педиатр. Минем эшемдә еш кына кыенлыклар туа иде, тәҗрибәм юк. Шуңа да икенче кешенең фикерен, өлкән иптәшемнең сүзләрен ишетәсем килә. Һәм бу минутларда мин һәрвакыт хезмәттәшем Ольга Владимировнаның ярдәменә исәп тота идем. Аның кечкенә пациентлар белән дә, хезмәттәшләре белән дә мөнәсәбәтләре бик яхшы иде. Сезне юбилеегыз белән котлыйм, сезгә һәм якыннарыгызга сәламәтлек һәм иминлек телим! » Оксана Евгеньевна Меркулова, табиб-педиатр: «Ольга Владимировна - минем язмышымны билгеләгән кеше.

Бала чагымда мин дә аның кебек игелекле, игътибарлы, дарулар белән генә түгел, күңел җылысы белән дә дәвалый белүче булырга хыяллана идем. Хыялым тормышка ашты: мин медицина институтын тәмамладым, хәтта берничә ел аның янында эшләдем. Ул мине иң мөһиме — үз пациентларыңны яратырга һәм беркайчан да профессиональ үсештә тукталмаска өйрәтте». Гөлнара Фоат кызы Хөсәенова, балалар кон-сультациясенең шәфкать туташы: «Мин коллективка япь-яшь кыз килеш, медицина училищесын тәмамлап килдем. Ольга Владимировна коллективта иң мөһим кеше иде, аның ярдәме белән мин коллективка бик тиз ияләштем, анда үз кеше булдым.

Ольга Владимировна Ходайдан бирелгән чын табиб ул. Ул һәр бала өчен вакыт тапты, хәтта иң борчылган ата-аналарны да тынычландыра ала иде. Аның белән эшләве рәхәт иде — шулкадәр зирәклекне, сабырлык һәм күңел юмартлыкны сирәк очратасың». Татьяна Викторовна Чеканова, шәфкать туташы (хәзер пенсиядә): «Ольга Владимировна Демидова белән мин 25 елдан артык эшләдем һәм моңа шатмын. Безнең балалар консультациясе коллективы бик зур булмаса да, дус иде. Ольга Владимировнаны балалар да, ата-аналар да бик яратты, нәкъ менә аңа язылырга тырыша иделәр. Ул әдәпле, гади кеше, барысын да аңлаешлы итеп аңлата иде. Ул балаларга аерым якын килә белде.

Мин аңардан күп нәрсәгә өйрәндем. Хезмәттәшләре белән ул тыгыз элемтәдә тора иде. Безнең хәлләребезне сораша, балаларыбызның сәламәтлеге белән һәрвакыт кызыксына иде. Кирәк булганда ярдәм кулын сузды. Без хәзер дә аның белән элемтәдә. Ольга Владимировна, юбилеегыз белән сезне! Сезгә нык сәламәтлек, бәхет һәм гаилә иминлеге телим. Без сезне бик нык яратабыз! » Ольга Владимировна һәрвакыт әйтә иде: «Педиатр – бу һөнәр генә түгел, бу сәләт. Балалар ихласлыкны тоя, әгәр син аларны яратасың икән, алар сиңа ышаныч белән җавап бирәләр». Нәкъ менә шушы ышаныч аның тормышында төп бүләк булды. Бүген, лаеклы ялда булса да, Ольга Владимировна яңа буын табиблары өчен үрнәк булып кала. Аның район медицинасы үсешенә керткән өлеше бәяләп бетергесез – терелеп чыккан йөзләгән бала, күпсанлы пациентларның рәхмәте һәм хезмәттәшләренең ихтирамы күпьеллык хезмәтләре өчен иң яхшы бүләккә әверелде.