95 яшь – олы юбилей: Виктор Будкин котлаулар кабул итте

Алексеевск районында өлкән буын вәкилләрен хөрмәтләүнең күркәм традициясе дәвам итә. Аларның язмышы туган як тарихы белән тыгыз бәйләнгән.

Март аенда районда яшәүче тыл хезмәтчәннәре һәм хезмәт ветераннары юбилейлары уңаеннан котлаулар кабул итте. Алар адресына озак еллар намуслы хезмәтләре, сабырлыклары һәм район үсешенә керткән өлешләре өчен җылы рәхмәт сүзләре яңгырады.

13 мартта башкарма комитет җитәкчесе урынбасары Елена Хамзина, ветераннар советы рәисе Елена Макарихина һәм социаль яклау бүлеге начальнигы Марина Солдатова Алексеевск бистәсендә яшәүче тыл хезмәтчәне Виктор Флегонтович Будкинны туксан биш яшьлек юбилее белән котладылар.

Юбилярга Россия Федерациясе Президенты Владимир Путиннан котлау открыткасы, Татарстан Республикасы Рәисеннән азык-төлек пакеты, шулай ук Алексеевск муниципаль районы башлыгы Сергей Демидовтан бүләк һәм котлау открыткасы тапшырылды.

Виктор Флегонтович Балык Бистәсе районының Масловка авылында туган. 1932 елда аның гаиләсе Алексеевск эшчеләр бистәсенә күченеп килгән. Бөек Ватан сугышы елларында, әле үсмер чагында ук, унике яшеннән «Красный Восток» совхозында эшли башлый: үгезләр белән җир тырмалый, үлән чаба, ашлык җыюда катнаша.

Сугыштан соң да шул ук хуҗалыкта хезмәтен дәвам итә — тракторчы, тимерче, кочегар булып эшли. Нәкъ шуннан лаеклы ялга чыга. Виктор Флегонтовичның гомуми хезмәт стажы 57 ел тәшкил итә. Хатыны белән ике ул тәрбияләп үстергәннәр. Хәзер аның ике оныгы һәм бер оныкчыгы бар.