Еллар һәм хезмәт аша: тыл хезмәтчәне Фаадә Гайфулла кызы Гыймадиевага 95 яшь

Тыл хезмәтчәне, хезмәт ветераны Гыймадиева Фаадә Гайфулла кызы үзенең 95 яшьлек юбилеен каршылады.

Бу гаҗәеп хатын-кызның гомер юлы — тулы бер чор: сугыш елларының авыр балачагы, сугы-штан соң илне торгызу, мәхәббәт, балалар үстерү һәм туган җир хакына тыныч хезмәт.

Иртән үк юбилярның өендә кояшлы да, кунаклы да иде. Алексе-евск муниципаль районы мәгариф бүлеге начальнигы Вячеслав Рыдаев Фаадә Гайфулла кызына Россия Федерациясе Президенты В.В. Путин исеменнән котлау открыткасын шәхсән тапшырды. Юбиляр республика Рәисе исе-меннән бүләкне, шулай ук район башлыгы Сергей Демидовтан котлау открыткасын һәм бүләкне дә зур дулкынлану белән кабул итте. Бу көнне озын гомерле апа үзен бөтен районның игътибары һәм кайгыртуы белән уратылган итеп тойды.

Фаадә Гайфулла кызы 1931 ел-ның 15 апрелендә Аксубай районының Яңа Демкино авылында туа. Аның балачагы Бөек Ватан сугышы башлану белән кинәт өзелә. Нибары 5 класс белем алган кыз, олылар белән беррәттән, авыр хезмәт юлын үтә. Ир-егетләр фронтка киткәндә, нәфис гәүдәле үсмерләр һәм хатын-кызлар тылны үз җилкәләрендә күтәрә. Сугыш елларында ук Фаадә Гайфулла кызы, үсмер булуына карамастан, Бөек Җиңүгә үз өлешен кертә, шуның өчен аңа «Тыл хезмәтчәне» исеме бирелә.

Язмыш Фаадә апага яхшы кеше белән очрашу насыйп итә. 1963 елда ул Гыймадиев Гәрәфетдин Хәбетдин улына кияүгә чыга һәм гомерлеккә туган йортына әверелгән гүзәл Шәмә авылына күчә. Ир белән хатын мәхәббәт һәм татулыкта өч бала тәрбияләп үстерә.

Бүген бу гаиләнең иң зур байлыгы — матди кыйммәтләр түгел, ә кешеләр. Фаадә Гайфулла  кызының 7 оныгы һәм 4 оныкчыгы бар. Алар өчен ул — нәсел сакчысы һәм тере тарих.

Лаеклы ялга чыкканчы Фаадә Гайфулла кызы Свердлов исе-мендәге колхозда бозау караучы булып эшли. Терлекче хезмәте — гади эш кенә түгел, ул зур сабырлык һәм киң күңел таләп итә тор-ган һөнәр. Аның алтын куллары, изге күңеле өчен аны авылдашла-ры да, хезмәттәшләре дә тирән хөрмәт итә.

Олы яшьтә булуына карамастан, Фаадә Гайфулла кызы зирәк акылын һәм нык рухын саклый. Ул — барлык сынауларны лаеклы үтеп, тормышка һәм якыннарына мәхәббәтен югалтмыйча яши.