Гаиләсе өчен кайгыртып һәм хезмәттә үткән гомер

Юбилярны әлеге истәлекле дата белән котларга Лебедино авыл җирлеге башлыгы Юлия Мингулова һәм беренчел ветераннар оешмасы рәисе Валерий Курочкин килде. Елизавета Артемьевнага Россия Федерациясе Президенты Владимир Путинның котлау открыткасы, Татарстан Республикасы Рәисе Рөстәм Миңнеханов исеменнән бүләкләр җыелмасы, шулай ук Алексеевск районы башлыгы Сергей Демидовтан котлау һәм азык-төлек пакеты тапшырылды.

Елизавета Артемь-евнаның гомер юлында авыр сынаулар да, намуслы хезмәт тә, гаилә бәхете дә бул-ган.

Ул 1931 елның 1 июнендә Чуваш АССРының Цивиль районында туган. Кыз бала кечкенә вакытта ук әнисе вафат була. Озакламый күп балалы гаилә Татар АССРына күчеп килә. Алар яшәгән авыл соңрак Куйбышев ГЭСын төзегән вакытта су астында кала.

Бөек Ватан сугышы еллары аеруча авыр була. Сугыш чорының күп кенә балалары кебек үк, Елизавета Артемьевнага да иртә өлгерергә туры килә. Ир-атлар фронтка киткәч, авыл эшләренең зур өлеше үсмерләр җилкәсенә төшә. Ул кырда эшли, үгезләр белән печән һәм су ташый, болыннарда кыргый суган җыя. Исән калу өчен яз көне өшеп калган бәрәңгедән көлчә пешерәләр. Һәр көн чыдамлыкка һәм рух ныклыгына чын сынау була.

Сугыштан соң Елизавета Артемьевна авыл хуҗалыгында хезмәт итүен дәвам итә. Башта колхозда төрле эшләрдә эшли, ә соңрак «Лебединский» совхозы оешкач, күп еллар сыер савучы булып хезмәт куя. Юбилярның гомуми хезмәт стажы 40 елдан артык тәшкил итә.

Озак еллар дәвамын-дагы намуслы хезмәте өчен ул күп тапкырлар бүләкләр һәм мактау билгеләре белән бүләкләнгән. Алар арасында «Ударник труда» һәм «Отличник социалистического соревнования» исемнәре дә бар.

Елизавета Артемьевна үзенең иң зур байлыгы итеп гаиләсен саный. Тормыш иптәше белән бергә алар дүрт бала тәрбияләп үстергәннәр. Бүген аны якыннарының кайгыртуы һәм игътибары чолгап алган. Ул җиде оныгы һәм дүрт оныкчыгының уңышларына сөенә. Алар – зур һәм тату гаиләнең дәвамы.

Елизавета Артемь-евнаның язмышы – ныклык, хезмәт сөючәнлек һәм туган җиргә тугрылык үрнәге. Аның тормыш юлы чын күңелдән хөрмәт һәм рәхмәт хисләре уята.