Казан һәм Яшел Үзәндә «ФИЗРА» комплекслары тиздән ачыла

Бу объектлар «Россия спорты» дәүләт программасына керүче «Бизнес-спринт (Мин спортны сайлыйм)» федераль проекты ярдәмендә шәхси инвесторлар тарафыннан сафка бастырыла. Бу хакта республиканың Спорт министрлыгы матбугат хезмәте хәбәр итте.

Татарстан спорт министры урынбасары Алмаз Хөсәенов билгеләп үткәнчә, спорт инфраструктурасы бары тик зур шәһәрләр өчен генә түгел, ә район үзәкләрендә яшәүчеләр өчен дә мөһим. Әлмәттә һәм Чаллыда инде эшләп килүче, ә Казан белән Яшел Үзәндә төзелеп бетә торган комплекслар йөзләгән кешегә өйләреннән ерак түгел уңайлы шартларда шөгыльләнергә мөмкинлек бирәчәк. Дәүләт һәм эшмәкәрләр берлектә халыкны физик культурага һәм сәламәт тормышка дәртләндерү өчен шартлар булдыра.

Хәзерге мизгелдә объектларда төзелеш-монтаж эшләре тәмамлану стадиясендә, аларны 2026 ел ахырына кадәр файдалануга тапшыру планлаштырыла. Ике комплексның да инвесторы — «ФИЗРА» ширкәте. Һәрберенең бәясе — 350 миллион сум. Киләчәктә монда футбол, волейбол, баскетбол, шулай ук төрле көрәш төрләре буенча шөгыльләнергә мөмкин булачак.

Бу Татарстанның дәүләт-хосусый партнерлык (ДХП) механизмын кулланудагы беренче тәҗрибәсе түгел. 2023–2024 елларда ук Әлмәт һәм Чаллыда шул ук схема буенча «ФИЗРА»ның ике аналогик комплексы төзелеп эшли башлаган иде.

Татарстан дәүләт-хосусый партнерлык аша спорт корылмалары төзү буенча илдә иң алдынгы төбәкләрнең берсе булып тора. Бу алым төбәк һәм муниципаль бюджетларны артык йөкләмичә, халык өчен заманча спорт мәйданчыкларын якын-тирәдә булдырырга мөмкинлек бирә.