Өч хикәя — йөрәк белән сайланган юл турында

Без бүген кайгыртучанлыкны гади эш итеп түгел, ә гомерлек юл итеп сайлаган кешеләрне котлыйбыз.

Һәм бу хакта иң яхшысы — үз геройларыбыз сөйләсен. Өч хатын-кыз, өч язмыш — төрле, әмма иң мөһиме бер-берсенә охшаш.

 Юлия Морозова: «Мин кем  буласымны балачактан ук белдем»

Юлия Морозова тарихы балачактан башлана. Ул еш кына әбисе Нина БорисовнаТарасова янына сөт комбинатының медпунктына килә. Әбисенең пациентлар белән сөйләшүен, уколлар ясауын, процедуралар үткәрүен күзәтә. Һәм шул чакта ук ныклап карар кыла: ул бары тик медицина хезмәткәре булачак.

Мәктәптән соң — турыдан-туры Чистай медицина училищесына укырга керә. Башка вариантларны ул хәтта уйлап та карамый. Укыган саен, бу һөнәрнең аныныкы икәнен тагын да ныграк аңлый.

Хезмәт юлын Алексеевск үзәк район хастаханәсендә палаталы шәфкать туташы буларак башлый: башта терапия бүлегендә, аннары хирургиядә эшли. Өлкән хезмәттәшләре, табиблар ярдәм итә, көч бирә.

— Эш кешеләргә ярдәм итә алуым өчен шатлык китерде, — ди Юлия.

Баш табиб аны Кыркүл ФАПына фельдшер итеп эшкә тәкъдим иткәч, ул ризалаша. 2010 елның мартыннан бирле шунда хезмәт куя. Кыркүл аның өчен гади авыл түгел — бу аның кече ватаны. Биредә аның әбисенең әбисе Клавдия Антоновна яшәгән.

Бүген Юлия һаман да үз һөнәрен ярата.

— Яшьләргә әйтер киңәшем бер: күңелгә ошаган эшне сайлагыз, модага карап түгел, ә йөрәк кушканча. Хезмәт-тәшләремә исә — сәламәтлек, көч һәм өйләрендә иминлек телим, — ди ул.

Ирина Сафина:«Без аны чукындырдык, мин аның исем әнисе булдым»

Ирина Сафина — «Бал корты» балалар бакчасының өлкән шәфкать туташы. 12 ел дәвамында ул сабыйлар сәламәтлеге өчен җавап бирә. Әмма бу юл балалар бакчасыннан башланмый.

Аның да хыялы балачактан медицина була. Ул мәктәптән соң  Буа медицина училищесына укырга керә. Аннан соң Казанда, Республика балалар клиник хастаханәсенең изоляция-диагностика бүлегендә эшли. Үзе әйтүенчә, бу — чын тормыш мәктәбе була.

Аеруча истә калган вакыйга: бүлеккә яңа туган кыз бала керә, ата-анасы аннан баш тарта. Хезмәткәрләр аны әйләндереп ала, тәрбияли. Балага Лиза дип исем кушалар. Бер ел ул хастаханәдә яши — хезмәткәрләр аның гаиләсе була.

Кызны хастаханәдә чукындыралар, һәм Ирина Ивановна аның исем әнисе була.

Лиза бер яшьтә булганда аны гаиләгә алалар. Ул балалар йортына эләкми. Соңыннан да элемтә өзелми — очрашулар, бәйрәмнәр, аралашу дәвам итә. Бүген Лиза үзе әни, әмма бу бәйләнеш саклана.

2007 елда Ирина Ивановна Алексеевскига күчә. Район хастаханәсендә, аннары хәрби комиссариатта фельдшер булып эшли. 2014 елдан — «Бал корты» бакчасында.

—Хөрмәтле хезмәт-тәшләрем! — ди ул. — Чын шәфкать туташы — бу белем, күнекмә һәм иң мөһиме — шәфкать һәм кызгануның бергә кушылуы. Бу һөнәрнең нигезе — мәрхәмәт.

Вера Асекретова: «Башта  пешекче идем,  аннары барыбер медицинага килдем. Улым да минем  юлдан китте»

 Вера Асекретова юлы турыдан булмый, ләкин бик күрсәткечле. Балачактан ул табиб булырга хыяллана. Әмма мәктәптән соң Алексеевск лицеена пешекче-кондитер һөнәренә укырга керә.

Ләкин хыялы бетми. Ул барыбер медицина колледжына укырга керә һәм 2006 елда «Дәвалау эше — фельдшер» белгечлеге буенча тәмамлый. Укыган чакта ук Алексеевск үзәк район хастаханәсендә ашыгыч ярдәм бүлегендә эшли башлый.

Аннары терапия бүлеге, балалар бакчасында алты ел эшләү, хәзер — балалар поликлиникасы.

— Минем иң зур горурлыгым — улым Артём, — ди ул. — Ул башта механик һөнәрен алды, аннары медицина институтына керде. Хәзер беренче курсны тәмамлый.

— Хөрмәтле хезмәттәшләрем! — ди Вера Владимировна. — Сезгә сабырлык, игелек һәм кешеләргә ярдәм итүегез өчен рәхмәт. Сәламәтлек, тынычлык һәм гаилә җылылыгы телим.

Өч хатын-кыз, өч язмыш

 Юлия Андреевна Морозова — үз тамырларын саклап, Кыркүл ФАПында шәфкать туташы.

Ирина Ивановна Сафина — бервакыт сабыйның исем әнисе булган һәм бу мәрхәмәтне гомер буе йөрткән кеше.

Вера Владимировна Асекретова — башка юлдан китеп тә, барыбер үз һөнәренә кире әйләнеп кайткан һәм улын да иярткән әни.

Алар безнең янәшәдә яши. Һәр иртә эшкә китәләр — ярдәм кирәк булган кешеләр янына ашыгалар. Һәм моны акча өчен түгел, ә йөрәк кушуы буенча башкаралар.

Хөрмәтле шәфкать туташлары һәм фельдшерлар, бәйрәм белән!