Тарихи хәтерне саклау – бүгенге буын бурычы

Делегация составында Алексеевск благочиниесе хаҗилары, Алексеевск округы благочинные протоиерей Павел Чурашов, шулай ук Алексеевск районы буенча Россия Эчке эшләр министрлыгы бүлеге ветераннар советы рәисе Рафис Шиһапов булды.

Мәңгелек ут янында сәфәрдә катнашучылар чәчәкләр салдылар һәм Бөек Ватан сугышы елларында Ватаныбызның азатлыгы һәм бәйсезлеге өчен һәлак булганнарны бер минутлык тынлык белән искә алдылар. Аннан соң сугыш кырында һәм тылда Җиңүне якынайткан яугирләр һәм барлык кешеләр рухына багышлап искә алу догасы укылды.

Советлар Союзы Герое Николай Васильевич Мамонов истәлегенә аерым игътибар бирелде. Аның исеме Алексеевск районы белән тыгыз бәйләнгән. Сугышка кадәр ул Алексеевск сөт заводында эшләгән, ә сугыш елларында гаять зур батырлык һәм хәрби каһарманлык күрсәткән.

1944 елның октяб-рендә подполковник Мамонов Көнчыгыш Пруссия операциясе вакытында укчы полк белән командалык итә. Аның сугышчылары дошман оборонасын өзеп керә һәм Пелта елгасын кичеп чыга. 26 октябрьдә Николай Васильевич, шәхсән үзе сугыш хәрәкәтләре белән җитәкчелек иткәндә, дошман авиациясе һөҗүменә эләгә һәм үлем җәрәхәте ала. Күрсәткән батырлыгы һәм кыюлыгы өчен аңа үлгәннән соң Советлар Союзы Герое исеме бирелә. Аның батырлыгы истәлегенә азат ителгән Хайлигенбайль шәһәре Мамоново дип үзгәртелә.

Сәфәрдә катнашучылар билгеләп үткәнчә, тарихи хәтерне саклау бүген аеруча мөһим. Мондый очрашулар ил тарихының каһарманлык битләрен искә төшерергә генә түгел, ә яшь буынга Ватан сакчылары батырлыгына хөрмәт тәрбияләргә дә ярдәм итә.

Алексеевск районы буенча Россия Эчке эшләр министрлыгы бүлеге ветераннар советы рәисе Рафис Шиһапов әйтүенчә, Мамоновога сәфәрләр күп еллар дәвамында Бөек Ватан сугышы тарихын кадерләгән кешеләрне берләштерә.

– Без монда беренче ел гына килмибез. Безнең өчен бу гади сәфәр түгел, ә геройларыбыз батырлыгы алдында баш ию мөмкинлеге һәм Җиңүнең нинди бәя белән яуланганын тагын бер кат искә төшерү. Николай Васильевич Мамонов исеме Алексеевск районы белән бәйле булуы аеруча мөһим. Без якташыбыз белән горурланабыз һәм аның батырлыгы турында киләчәк буыннарга сөйләүне үз бурычыбыз дип саныйбыз, – дип билгеләп үтте Рафис Шиһапов.

Мондый истәлекле очрашулар буыннар арасындагы өзелмәс бәйләнешне һәм Бөек Ватан сугышы вакыйгалары турындагы хакыйкатьне саклауның мөһимлеген искәртә.

Ватан өчен сугышкан, тылда хезмәт куйган һәм көтеп алынган Җиңүне якынайткан һәркемнең якты истәлеге мәңгелек булсын.