Татлы чәчәк бәйләмнәре һәм социаль контракт: Алексеевск районы остасының тарихы

Ул — иҗат дөньясы: нәфис зефирдан чәчәкләр тудыра, ә милли татлы ризыклар чын сәнгать әсәрләренә әверелә.

Аның тарихы — кулинариягә мәхәббәт, гаилә ярдәме һәм дәүләт программасы ике бала әнисенә үз юлын табарга ничек ярдәм иткәнен күрсәтә.

Медицина институтыннан зефир таҗларына кадәр

Рәзинә балачактан ук күп вакытын кухняда үткәрүен әйтә. Пешерү процессы, аеруча камыр ризыклары әзерләү, аны һәрвакыт җәлеп иткән.

«Һәрвакыт тәмле дә, матур да килеп чыкмады, — дип елмая Рәзинә, — ләкин мин беркайчан да төшенкелеккә бирелмәдем, кабат-кабат сынап карадым».

Тормыш үз юлыннан киткән кебек: мәктәптән соң медицина институты, аннары туган

Алексеевск районына кайту, кияүгә чыгу. Әмма беренче кызы Дилә туу аның күңелендәге иҗатка омтылышны яңадан уяткан. Кызы йоклап киткәч, яшь әни ял итәргә ятмаган, ә яңа һөнәр — маршмеллоудан фигуралар ясау серләрен өйрәнгән.

«Аз йокладым, ләкин тырышып бик зур теләк белән өйрәндем», — дип искә ала ул.

Гади зефирлар өчен беренче заказлар да озак көттермәгән, һәм бу аңа алга таба үсәргә көч биргән.

Рәзинә районда әлегә булмаган яңалык тудырырга теләгәнен аңлаган.

Шулай итеп ул зефир флористикасына — чын чәчәкләр кебек күренгән, ләкин шул ук вакытта бик тәмле булган нәфис бәйләмнәр ясарга керешкән.

Әни, хатын, оста: ничек барысына да өлгерергә

Икенче кызы Әминә туу белән вакыт тагын да кими. Әмма кондитерлык эше — «үз эше» икәнен аңлау Рәзинәне туктатмый. Ул буш араларда укый, зефир чәчәк бәйләмнәренә заказлар кабул итә.

Борылыш ноктасы — кече кызының балалар бакчасына йөри башлавы. Нәкъ шул вакытта Рәзинә җитди адым ясарга һәм социаль контракт төзергә карар итә. Бу ярдәм чарасы белән гаилә инде таныш була: аның ире Марат 2022 елда социаль контракт ярдәмендә үзенең барбершобын ачкан.

Хыялга 350 мең сум: социаль контракт яңа мөмкинлекләр ачты

«Мин үз эшем белән шулкадәр янып яшәдем ки, бернинди киртә дә күрмәдем. Чынлыкта алар юк та иде», — ди героинябыз документлар рәсмиләштерү турында.

Тәртип аңлаешлы була. Рәзинә гариза бирә, документлар пакетын җыя (иң мөһиме — бизнес-план), тест үтә һәм проектын яклый. Яклау узганнан соң икенче көнне үк исәп-хисап счетына 350 мең сум акча күчерелә.

Яшь остабикә өчен бу акча зур этәргеч була.

«Иң көтеп алынган сатып алу, әлбәттә, миксер булды. Мин аны күптән хыяллана идем, ләкин мөмкинлек юк иде. Хәзер ул минем кухнямда тора!» — дип шатлана Рәзинә.

Моннан тыш, ул туңдыргыч камера, яңа духовка һәм эш өчен кирәкле материаллар — төрү тартмалары сатып ала.

Хәзер һәр заказ матур итеп әзерләнеп, клиентларга куркынычсыз барып җитә.

Букетлар гына түгел

Яңа җиһазлар аркасында ассортимент та киңәйгән, клиентлар саны да арткан. Бүген Рәзинә Абдуллина якташларын зефир чәчәк бәйләмнәре белән генә түгел, ә никах мәҗлесләре өчен махсус җыелмалар белән дә сөендерә. Аның кулында төрле төр чак-чак, бавырсак һәм башка милли тәмлеләр аеруча бәйрәмчә күренә.

«Минем клиентларым — иң яхшылары, — ди остабикә. — Һәр заказ һәм җылы сүзләрегез өчен зур рәхмәт.

Эшләү дәверемдә беркем дә минем ризыклар турында начар сүз әйтмәде».

Киләчәккә караш һәм киңәш

Хәзер Рәзинә өй кухнясында эшли — мәйдан җитә. Әмма планнары зур.

«Алда, әлбәттә, киңәергә телим. Үземнең цех яки кечкенә кондитер остаханәсе булсын иде. Әлегә бу мәсьәләне өйрәнәм, финанс ягын әзерлим», — ди ул.

Үз эшен башларга теләүчеләргә ул гади һәм ихлас киңәш бирә:

«Социаль контракт — кеше өчен бик зур ярдәм. Курыкмагыз, батыр булыгыз! Әгәр сезнең теләгегез бар һәм эшегез белән янып яшисез икән — бернинди киртәләр дә булмаячак. Мондый мөмкинлектән файдаланыгыз, ул чыннан да эшли һәм тормышны яхшы якка үзгәртә».

Бүген әни дә, хатын да, ихтыяҗлы оста да булырга өлгергән бәхетле хатын-кызга карап, шуны аңлыйсың: аның уңышының төп сере — башкарган эшенә булган мәхәббәт. Әлбәттә, якын кешеләренең зур ярдәме дә мөһим роль уйный: ул көч бирә, яңа идеяләргә илһамландыра. Чөнки янәшәңдә сиңа ышанучы кешеләр булганда, теләсә нинди үрләр яуланырлык булып тоела.