Юлларны ремонтлау

Алексеевск җирлеге башкарма комитеты җитәкчесе Александр Харитонов сөйләгәнчә, юллар аерым режимда ремонтланачак һәм үзәк урамнарга да, икенче дәрәҗәдәгеләренә дә кагыла:

- Чәршәмбе көнне Ленин һәм Совет урамнарын ремонтлый башладылар, хәзер Гагарин, Бутлеров, Куйбышев һәм башка урамнар ремонтлана. Аларны төгәлләүгә үк алар янындагыларына күчәчәкбез. Коммуналь хезмәтләр барлык эшләрне май ае урталарына төгәлләргә ниятлиләр.

Юлларны капиталь ремонтлауга килгәндә, ул юл эшләренең республика программасы акчасына эшләнә. Бу хакта Алексеевск муниципаль районы башкарма комитеты җитәкчесе Анатолий Абакумов хәбәр итте. Аның сүзләре буенча, капиталь ремонтка 10 миллион сум акча бүлеп бирелгән һәм бу акча район үзәгендә юл полотносын яхшыртуга юнәлдереләчәк:

- Бистәнең төп юлларында җитди проблемалар юк, Татарстан юл хезмәте белгечләре урамнар буйлап уздылар һәм иң проблемалы участокларны билгеләделәр. Бу - Подлесная урамы, анда юл былтыр федераль трассаны ремонтлаганда җимерелгән. Казаков урамы, анда да коммуникацияләр салганнан соң юл полотносы зыян күргән (биредә эшләр төгәлләнгән диярлек - Авт.). Планда - Набережная урамын ремонтлау, биредә күп фатирлы өйләрнең берничә ишегалдында яңа асфальт җәелгән. Шулай ук Гагарин һәм Совет урамнарындагы берничә йортта да юл полотносын ремонтлау төгәлләнгән.

"Алексеевскдорстрой" эшчеләре башкара торган барлык эшләрне май ае азагында бетерергә ниятлиләр. Авылларда юлларны ремонтлауга килгәндә, Анатолий Николаевичның сүзләре буенча, бу максатларда башка программа каралган, ләкин хәзерге мизгелгә районда аны тормышка ашыру башланмаган да әле.