Ана капиталын түгәрәкләргә һәм автомәктәпкә дә юнәлтеп була

Бердәм пособие

Ярдәм итүнең иң кирәкле чараларының берсе булып Бердәм пособие кала. Түләүгә гаиләдә бер кешегә айлык кереме җан башына региональ яшәү минимумыннан артмаган гаиләләр, шулай ук хисап чорында гаиләнең хезмәткә сәләтле һәр әгъзасының кереме кимендә 8 МРОТ тәшкил иткән гаиләләр хокуклы. Түләү күләме гаилә кеременә бәйле һәм балага билгеләнгән яшәү минимумының 50%, 75% яки 100% тәшкил итәргә мөмкин.

Ана капиталы — белем алу өчен

Ярдәмнең тагын бер мөһим чарасы — ана капиталы. Аның акчаларын ата-аналар балаларының белем алуына да куллана ала. Программаның мөмкинлекләре мәктәп яки югары уку йортлары өчен түләү белән генә чикләнми. Ата-аналар акчаны баланы балалар бакчасында тотуга, карау хезмәтләре өчен түләүгә, шулай ук өстәмә үстерү дәресләренә — түгәрәкләргә, спорт секцияләренә, иҗади студияләргә, чит телләр курсларына яки хәтта автомәктәптә белем алуга юнәлтә алалар.

Төп шарт үзгәрешсез кала: акчалар күчерелә торган мәгариф оешмасының тиешле эшчәнлек алып бару өчен гамәлдәге лицензиясе булырга тиеш.

Ел саен түләнә торган гаилә түләве

2026 елдан ике һәм аннан да күбрәк баласы булган гаиләләр өчен яңа ярдәм чарасы — ел саен түләнә торган гаилә түләве гамәлдә. Түләү җан башына уртача кереме алдагы елга төбәктә билгеләнгән яшәү минимумының 1,5 тапкырдан артмаган гаиләләргә билгеләнә. Түләү суммасы керемнәрдән түләнгән НДФЛ суммасы белән 6% ставкасы буенча исәпләнгән сумма арасындагы аерманы тәшкил итәчәк. Гаризаны 1 октябрьгә кадәр бирергә мөмкин.

СФР бүлеге идарәчесенең сүзләре

«Балалы гаиләләргә ярдәм итү — безнең эшнең төп юнәлешләренең берсе. Ата-аналарның үз хокукларын белүе һәм тиешле ярдәм чараларыннан вакытында файдалана алуы аеруча мөһим. Яңа уку елы башлану һәрвакыт өстәмә мәшәкатьләр белән бәйле, шуңа күрә без хезмәтләрне мөмкин кадәр гади һәм уңайлы итәргә тырышабыз. Укучыларга кызыклы уку елы, яңа белемнәр һәм казанышлар, ә ата-аналарга сабырлык, тынычлык һәм балалары белән мөмкин кадәр күбрәк горурланырлык сәбәпләр телим», — дип билгеләп үтте Россия Социаль фондының Татарстан Республикасы буенча бүлеге идарәчесе Эдуард Вафин.

Ярдәм чараларының күпчелеген дәүләт хезмәтләре Порталы аша электрон рәвештә рәсмиләштерергә мөмкин. Балалы гаиләләр өчен түләүләр һәм хезмәт күрсәтүләр турында тулырак мәгълүмат Россия Социаль фондының рәсми сайтында урнаштырылган.