Хастаханәдә балаларны яклау көне

Балалар консультациясе докторлары һәм шәфкать туташлары махсус җомга көнне - сәламәт балаларны карау көнендә бәйрәм оештырдылар. Бинага керү юлын, фойе һәм кабинетларны шарлар белән бизәп, шул рәвешле кечкенәләр һәм аларның әти-әниләренең кәефен күтәрәселәре килде аларның. Табибкә үз чиратларын көтеп торганда балалар, дөрестән дә, күңелсезләнеп утырмадылар: шарларны тотып алып кулдан-кулга йөрттеләр, куанып һавага чөйделәр. Әмма иң көтелмәгәне шул булды: балалар поликлиникасына керү юлында сабыйларны ягымлы елмаеп Клоун белән Микки-Маус каршы алды: алар балаларны тәмле конфетлар белән сыйладылар һәм яшь балалы әниләргә күкрәк сөтенең өстенлеге турында брошюралар өләштеләр.
- Кабул итүне алмаштырырга хакыбыз юк, - ди педиатр Рамилә Фәссахова, - шуңа күрә дә аны менә шундый сюрпризлар белән тулыландырырга тырыштык. Моннан тыш, бүген бирегә килгән һәр бала үз участок табибыннан бүләккә витаминнар да алды. Ә бу кечкенә бәйрәмне оештырырга безгә волонтерлар - "Элита" эстрада-хореография коллективында тәрбияләнүчеләр булышты. Бүген бездән балалар шатланып һәм канәгать булып киткәннәрдер, дип ышанам.