“Боз һәм ялкын”

Район башлыгы призына күптән инде гадәткә кергән хоккей турниры узган гыйнвар якшәмбесендә старт алды. Чыгыш ясау-котлау өлешеннән, уңышлар, җиңүләр һәм әдәпле уеннар теләгәннән, шулай ук быелгы турнирның кайбер үзенчәлекләренә төгәллек керткәннән соң боз өстендә бу сезонда "алтын"га төп дәгъва итүчеләр-Тат.Майна авылы һәм "Алексеевскдорстрой" командалары калды.

Шулай итеп, игътибар! Судьяның сыбызгысы яңгырый... Секундомерлар эшкә кереште. Ыргыту! Алканы Тат. Майна уенчылары тотып ала. Төгәл тапшыру, пас, тагын пас!.. Көндәшләрнең кәшәкәсе астына саклаучы ташлана, эффектлы дуганы сурәтләп, кемнеңдер бишбармагы оча, һәм капкалар капкачына беренче һөҗүм ясала...
Тәнәфесләрдә тамашачылар, уенчылар белән гәп корып алу һәрвакыт кызык була. Бер-ике сорау биреп, командалар турында бераз күзалларга, бүгенге очрашуның ничек төгәлләнәчәген фаразларга мөмкин.
-Көндәшләребез-көчле команда. Ләкин безнең бик тә җиңәсебез килә!
-Нишләптер мин үзебезнекеләр өчен кайгырам. Күр дә тор-оттырачаклар!
Һөҗүмнәр каршы һөҗүмнәргә алмашына. Куәтле ыргылышлар, кагыйдәләр чикләрендә көч алымнары. Беренче периодның уникенче минуты бара. Менә беренче, озак көтелгән гол! "Алексеевскдорстрой"ның капкалары "ачыла". Беренче период уенчыларның берсен уеннан чыгару белән тәмамланды.
-Ничек, уен сезгә ошыймы?
-Берничек тә түгел. Командалар начар әзерләнгән.
Сыбызгы, һәм икенче период башлана. Удар-һәм алка белән бергә кәшәкә дә оча! Ыргыту, тагын, тагын! Һәм капкачы капкага очып килә торган снарядны кире кайтара. Тагын кертергә маташу. Капка янында ыгы-зыгы. Уен туктатылды-алка тозакта! Яңадан һөҗүм, һөҗүм, һөҗүм...Уен кызганнан-кыза бара, икенче егерме минут та зур хоккейның иң яхшы традицияләрендә төгәлләнмәде-спортка хас булмаган мөнәсәбәтләрне ачыклау һәм, нәтиҗәдә, тәртип бозучыларга җәза бирелде.
-Бераз бәхәсләшкәннәр икән, бернинди куркынычы да юк.!
-Ә кем гаепле?
Гадәттәгечә, барысы да!
Соңгы период... Этеп-төртеп көндәшеңнең зонасына чыгарга тырышу, алканы "борт"ка каты итеп сугып җибәрү-барысы да Бобби Халлның иң яхшы традицияләрендә.Һөҗүм, һөҗүм, го-о-о-л! Өченче периодның дүртенче минуты "Алексеевскдорстрой" командасы өчен соңгы һәм катгый "кире әйләнеп кайтмау нокта"сы булды. Бу сезонда беренче матч Тат. Майна уенчылары файдасына 2:0 исәбе белән тәмамланды.
Ләкин нинди дә булса нәтиҗәләр ясарга иртәрәк әле. Җиңүче "әйләнә" буенча уйнаганнан соң февральдә генә билгеле булачак.
-Уен кызык килеп чыкты. Көндәшләр тигез диярлек иделәр бит.
-Бездә әлегә уенда катнашучылар арасында үзара килешү юк. Без әле кулдан ычкындырылганның барысын да кире кайтарачакбыз. Иң яхшы уеннарыбыз алда!
-Без хоккейны бик яратабыз, авылдашларыбыз өчен һәрчак кайгырабыз һәм алар белән горурланабыз! Хоккей-текә уен ул!
Хоккей мәйданчыгы-фантастика мэтры Рэй Бредбери булдырган шундый ук планета. Монда да боз белән ялкын янәшә яши. Шугалакның боздай салкынлыгы һәм көйдергеч эсселек. Һөҗүмнәр, хис-тойгылар, спорттагы дәртләр эсселеге...