Нотариаль ризалык белән бәйле сорауларыгыз бармы?

Бу мәсьәләгә Татарстан Республикасы буенча Росреестр идарәсенең Алексеевск, Әлки һәм Спас районнары буенча районара бүлеге җитәкчесе Илсур Кәлимуллин аңлатма бирә.

– Россия Федерациясе Гаилә кодексының 35нче маддәсе 3нче пункты нигезендә, ир белән хатынның уртак күчемсез милке белән эш иткәндә, шулай ук нотариаль таныклауны һәм (яки) дәүләт теркәвен таләп иткән килешүләр төзелгәндә, икенче тормыш иптәшенең нотариаль расланган ризалыгы кирәк.

Шул ук вакытта гамәлдәге законнар элек бирелгән ризалыкны кире алу мөмкинлеген дә күздә тота. Әмма моны килешү төзелгәнче генә эшләп була.

Әгәр ир яки хатын ризалыгын кире алырга карар итә икән, нотариуска мөрәҗәгать итеп, ризалыкны гамәлдән чыгаруны шул ук формада рәсмиләштерергә кирәк. Димәк, ризалыкны кире алу да нотариаль тәртиптә расланырга тиеш.

Шуны аңлау мөһим: килешү төзелеп беткәннән соң ризалыкны кире алу аның гамәлдә булуына йогынты ясамый. Әйтик, сатып алу-сату килешүе инде төзелгән һәм билгеләнгән тәртиптә теркәлгән булса, соңыннан ризалыкны кире алу килешүне автомат рәвештә гамәлдән чыгару яки дәүләт теркәвен бетерү өчен нигез була алмый.

Шуңа күрә күчемсез милек белән бәйле килешүләр төзергә җыенган гражданнарга документларга кул куйганчы барлык шартларны җентекләп бәяләргә һәм нотариаль ризалык бирү яки аны кире алу турында карарны вакытында кабул итәргә кирәк.

Илсур Кәлимуллин билгеләп үткәнчә, күчемсез милеккә хокукларны рәсмиләштерү һәм килешүләрне дәүләт теркәве белән бәйле сораулар туганда, алдан ук нотариуска яки Росреестр белгечләренә мөрәҗәгать итү киңәш ителә. Бу киләчәктә мөмкин булган бәхәсләрдән һәм хокукый хәвефләрдән сакланырга ярдәм итәчәк.