Галина Николаевнаны юбилее белән котлыйбыз!

21 июньдә үзенең гомерен балалар дөньясы, музыка һәм иҗат белән бәйләгән күркәм шәхес – Галина Николаевна Харитонова юбилеен билгеләп үтте.

Ул 1955 елның 21 июнендә Алексеевск бистәсендә туган. 1973 елда Алексеевск урта мәктәбен тәмамлаганнан соң мәктәп китапханәсендә китапханәче булып хезмәт юлын башлый. Шул ук вакытта музыка мәктәбендә фортепиано классы буенча белем ала. Озак та үтми, музыка аның тормышындагы иң мөһим эшкә әверелә.

1975 елның сен-тябрендә Галина Николаевна район балалар бакчаларында музыка җитәкчесе булып эшли башлый. Соңрак Казан педагогика училищесын тәмамлап, тәрбияче белгечлеген үзләштерә. Дистә еллар дәвамында ул балаларга иҗат шатлыгы бүләк итә, аларның талантларын ачарга ярдәм итә, матурлыкны ишетергә һәм тоярга өйрәтә.

Озак еллар намуслы хезмәте һәм югары һөнәри осталыгы өчен Галина Николаевна күпсанлы бүләкләргә лаек була. Алар арасында Татарстан Республикасы һәм Россия Федерациясе Мактау грамоталары да бар. Аеруча зур горурлык булып «Халык мәгарифе отличнигы» исеме тора. Бу – яшь буынны тәрбияләүгә керткән зур өлешенә бирелгән югары бәя.

1992 елның апре-леннән аның хезмәт биографиясе «Каенкай» балалар бакчасы белән бәйле. Биредә ул музыка җитәкчесе генә түгел, ә коллективның чын күңел җылысы, кешеләрне иҗатка рухландыра белгән шәхес булып таныла.

Хезмәттәшләре аның белән бергә эшләгән елларны аерым җылылык белән искә ала.

– Галина Николаевна – зур йөрәкле, олы хәрефтән язылырлык кеше. Аның кулларында музыка җанлана һәм һәр бала өчен аңлаешлы телгә әверелә иде. Без аның балаларга никадәр ихлас мөнәсәбәттә булуын, хәтта иң тиктормас сабыйларга да юл таба белүен күрдек. Аның энтузиазмы нәтиҗәсендә гадәти иртәләр дә чын спектакльләргә әйләнә, ә балалар дәресләргә янып торган күзләр белән килә иде. Аның янында иҗат итәсе, яңалык уйлап табасы һәм яхшырак буласы килә иде, – дип сөйлиләр Марина Янонис, Мария Зайцева, Елена Шеланова һәм Энҗе Нуретдинова.

– Музыка җитәкчесе – ул гади педагог кына түгел. Ул тәрбияче, психолог, режиссер һәм хореограф сыйфатларын берләштергән кеше. Әмма иң мөһиме – балалар өчен үрнәк, якын дус һәм остаз булып тора. Ул аларга музыка һәм сәнгать дөньясын ачарга ярдәм итә, гадәти нәрсәләрдә дә матурлык күрә белергә өйрәтә.

Нәкъ менә шундый кеше ул – Галина Николаевна Харитонова, – дип уртаклашалар «Ромашка» балалар бакчасы тәрбиячеләре Марина Суркова һәм Светлана Сергеевнина. – Үз эшенең чын остасы, талантлы педагог һәм балалар күңеленә юл табучы нечкә күңелле шәхес буларак, ул озак еллар дәвамында нәниләргә иҗатка мәхәббәт бүләк итә, аларны рухландыра һәм сәләтләрен ачарга ярдәм итә.

Галина Николаевна өчен иң зур казаныш – бүләкләр һәм мактаулы исемнәр түгел, ә якыннарының мәхәббәте, хезмәт-тәшләренең хөрмәте һәм тәрбияләнүче-ләренең рәхмәте. Аларның күбесе бүген инде үз балалары һәм оныклары белән балалар бакчасына йөри.

Юбилярга иң җылы котлау сүзләрен балалары юллый:

– Бу яшь – тормышның чәчәк аткан мәле. Кеше тормышның чын кыйммәтләрен аңлый торган, вак-төяккә сөенә белгән, иң мөһиме мәхәббәт, гаилә һәм тугры дуслар икәнен төгәл белгән вакыт. Еллар сезгә бары тик зирәклек һәм бәхет кенә алып килсен. Сәламәтлегегез нык булсын, йөрәгегез һәрчак яшь калсын. Якын кешеләр һәрвакыт янәшәдә булсын, һәр көн шатлыклы очрашулар һәм күңелле вакыйгалар бүләк итсен. Без сезне бик яратабыз, сезнең белән горурланабыз һәм һәрчак янәшәдә булачакбыз.

Галина Николаевна гомеренең илле елдан артык вакытын балаларга, музыкага һәм тәрбия эшенә багышлаган. Йөзләгән бәйрәм концертлары, меңләгән балалар елмаюы, санап бетергесез җырлар, биюләр һәм бәхетле мизгелләр аның тәрбияләнүчеләре күңелендә мәңгегә сакланып калган.

Бүген ул лаеклы ялда булса да, аның исеме Алексеевск районындагы күп буын кешеләренә яхшы таныш. Элекке тәрбияләнүчеләре күптән инде үсеп җиткәннәр, үзләре дә балалар һәм оныклар тәрбиялиләр. Әмма алар музыка дәресләрен, бәйрәмнәрне һәм яраткан педагогларының ягымлы елмаюын бүген дә җылылык белән искә алалар.

Галина Николаевна тормышы – һөнәргә тугрылыкның, балаларга мәхәббәтнең һәм кешеләргә шатлык бүләк итә белүнең матур үрнәге. Аның йөрәгендәге моң бүген дә яңгырый – хезмәттәшләренең рәхмәтле хәтерендә, якыннарының мә-хәббәтендә һәм ул иҗат дөньясын ачарга ярдәм иткән кешеләр язмышында.

Галина Николаевнаны юбилее белән чын күңелдән котлыйбыз! Аңа нык сәламәтлек, күңел җылысы, шатлыклы очрашулар, якыннарының игътибары һәм бәхетле озын гомер телибез. Һәр яңа көн яхшы хәбәрләр алып килсен, янәшәсендә аны кадерләгән, хөрмәт иткән һәм ихлас күңелдән горурланган кешеләр булсын.

Котлыйбыз!