“Тукай безнең белән”

- Шушы көннәрдә Урта Тигәнәле урта мәктәбендә сөекле татар шагыйре Габдулла Тукайның туган көне билгеләп үтелде. Бәйрәмне башлангыч сыйныф укучылары белән укытучы Гөлнара Җаббарова әзерләде. Кунакка укытучылар, укучылар, "Ләйсән" балалар бакчасы нәниләре дә җыелган иде.

Шигърият бәйрәме бөек шагыйребезнең буыннан-буынга күчеп килгән "Туган тел" көе белән башланып китте. Укучылар Тукайның шигырьләрен, җырларын сәхнәләштерделәр. Азат Буранов белән Илзия Нотфуллина "Бала белән Күбәләк"не, Камил Сәхәбетдинов белән Адель Абдрахманов "Кызыклы шәкерт"не, Самат Камалов белән Самат Рәхмәтуллин "Кәҗә белән Сарык"ны бик оста башкардылар. Бәйрәмнең төп кунагы "Шүрәле" (Зилә Вәлиева) балалар белән рәхәтләнеп кети-кети уйнап алды. Алтын тарагын эзләп килгән "Су анасы" да (Рәмилә Зарипова) көтеп алган кунагыбыз булды. Бәйрәм бик шәп узды! Чарада кызыклы табышмаклар, мәкаль-әйтемнәр дә бар иде, җырлаучылар, шигырь сөйләүчеләр дә күп булды.Тукай көненә багышланган бәйрәмнән балалар бик канәгать калды. Бу - безнең аңа булган тирән хөрмәтебез һәм ихтирамыбыз.

Шулай ук ел саен Г. Тукай туган көне алдыннан Зәй шәһәрендә "Тукай укулары" фәнни-гамәли укучылар конференциясе уза. Быел да мәктәбебездән 3нче сыйныф укучысы Самат Камалов (җитәкчесе Сиринә Камалова) һәм 8нче сыйныф укучысы Земфира Рамаева (җитәкчесе Зилә Рамаева) бу укуларда уңышлы чыгыш ясадылар. Конференциядә Земфира призер дипломына лаек булды, ә Самат катнашучы сертификаты белән бүләкләнде. Афәрин, укучылар!

Габдулла Тукай безгә якын, кадерле, ул һәрчак безнең күңел түребездә сакланыр.

Фото:https://edu.tatar.ru/upload/news/256261.jpg