Сакон авылыннан – дөнья базарына

Барлык кирәкле тикшерүләрне узганнан соң, биш мең тоннадан артык ашлык Израильгә җибәрелде. Агымдагы навигация чорында җирле терминал өчен бу беренче генә халыкара җибәрү түгел.

Сакон авылындагы ашлык терминалы Татарстанның төп логистик объектларының берсе буларак үз статусын ныгытуын дәвам итә. Кама елгасы буендагы уңайлы урнашуы һәм заманча инфраструктурасы аркасында биредән даими рәвештә зур күләмдә ашлык партияләре эчке базарга да, чит ил кулланучыларына да озатыла.

Терминал Алексеевск районының су-ашлык хабы составына керә. Биредә ашлык белән эшләүнең тулы циклы гамәлгә ашырыла: кабул итү, эшкәртү, саклау һәм алга таба төяп озату. Предприятиенең еллык әйләнеше 300 мең тоннага җитә. Кышын ташулар автомобиль транспорты белән башкарыла, ә навигация ачылгач төп рольне елга транспорты үз өстенә ала.

Журналистлар килгән көнне причалда биш мең тоннадан артык күләмдәге азык-төлек бодайының чираттагы партиясе төялә иде. Йөк Израильгә экспорт өчен билгеләнгән. «Кама Агро +» ЧҖҖ учредителе Якуп Дәүләтшин сүзләренчә, проект инвесторларның өметләрен тулысынча аклаган.

– Төяп озату күләмнәре шактый артты. Бу объектны юкка гына төземәдек. Барысын да дөрес исәпләгәнбез. Бүген безнең эш тизлеген һәм терминал мөмкинлекләрен күргән партнерлар саны арта. Клиентлар үзләре безгә килә башлады, – дип билгеләп үтте ул.

Ләкин ашлык судно бортына эләккәнче, ул сыйфат һәм иминлек буенча мәҗбүри тикшерү уза. Терминалда Татарстан Республикасы буенча «Агросәнәгать комплексы продукциясенең куркынычсызлыгын һәм сыйфатын бәяләү үзәге» ФДБУ филиалы белгечләре эшләде.

Проба алу буенча белгеч Иван Спичков сөйләгәнчә, ашлык үрнәкләре төяү вакытында билгеле бер аралыклар белән турыдан-туры алына, аннары махсус сейф-пакетларга урнаштырыла һәм тикшерүләр үткәрү өчен лабораториягә җибәрелә.

Лабораториядә үрнәкләр киң күрсәткечләр исемлеге буенча тикшерелә. Экспертлар пестицидлар, микотоксиннар, агулы элементлар күләмен билгели, карантин корткычлары булмавын һәм продукциянең импортлаучы ил таләпләренә туры килүен тикшерә. Тикшерүләр уңышлы узганнан соң гына кирәкле рөхсәт документлары рәсмиләштерелә.

Татарстан Республикасы буенча «ЦОК АПК» ФДБУ филиалы директоры урынбасары Идрис Гатин билгеләп үткәнчә, һәр ил продукциянең сыйфаты һәм куркынычсызлыгына карата үз таләпләрен куя.

– Чит ил партнерлары агрохимикатлар һәм пестицидлар күләменә аеруча зур игътибар бирә. Шулай ук ашлыкның сыйфаты һәм клейковина күләме дә мөһим күрсәткеч булып кала, – дип ассызыклады ул.

Якуп Дәүләтшин сүзләренә караганда, лаборатор тикшеренү нәтиҗәләре предприятие эшчәнлегендә мөһим роль уйный.

– Белгечләр ашлыкның сыйфатын билгели һәм беркетмәләр бирә. Әлеге мәгълүматларга нигезләнеп, без нинди ашлык булуын беләбез һәм аны экспортлаучыларга тәкъдим итә алабыз, – дип аңлатты предприятие җитәкчесе.

2026 елгы навигация башланганнан бирле «ЦОК АПК» белгечләре контроле астында чит илләргә ашлык продукциясе төялгән җиде теплоход озатылган инде. Сакон авылыннан чираттагы озату Алексеевск районының Татарстан экспорт инфраструктурасының мөһим звеносы булып калуын, ә җирле ашлык терминалының тәэминат географиясе һәм ташу күләмнәрен ышанычлы рәвештә киңәйтүен раслый.