Кабат исерек хәлдә рульгә утырган Чистай кешесе колониягә җибәреләчәк

Ул исерек хәлдә автомобиль белән кабат идарә итүдә, шулай ук полиция хезмәткәренә ришвәт бирергә маташуда гаепле дип табылды.

Суд тикшерүе барышында ачыкланганча, 2025 елның 16 декабрендә Лебяжье авылындагы Абрамов урамында ЮХИДИ хезмәткәрләре җиңел автомобильне туктаткан. Руль артында булган ир-ат моңа кадәр инде исереклек хәлен ачыклау өчен медицина тикшерүе узудан баш тартканы өчен административ җаваплылыкка тартылган булган.

Шуңа да карамастан, ул яңадан исерек хәлдә руль артына утырган. Моннан тыш, җаваплылыктан качарга тырышып, хокук бозуны рәсмиләштермәгән өчен полиция хезмәткәренә акчалата бүләк тәкъдим иткән.

Суд ир-атны Россия Федерациясе Җинаять кодексының 264.1 нче маддәсе 1 нче өлеше, шулай ук 30 нчы маддәсе 3 нче өлеше һәм 291.2 нче маддәсе 1 нче өлеше буенча каралган җинаятьләр кылуда гаепле дип таныды.

Суд карары белән аңа кырыс режимлы төзәтү колониясендә җәза үтү белән 9 айга ирегеннән мәхрүм итү җәзасы билгеләнде. Моннан тыш, хөкем ителүче 2 ел да 6 ай дәвамында транспорт чаралары белән идарә итүгә бәйле эшчәнлек белән шөгыльләнү хокукыннан мәхрүм ителде.