70 ел тәртип һәм куркынычсызлык сагында хезмәттә

Нәкъ менә бу көнне җиде дистә ел элек СССР Министрлар Советы карары нигезендә эчке эшләр министрлыгы органнары каршында махсус бүлекчә - тышкы каравыл сагы булдырылды, аның вазыйфасына милекнең вак объектларын саклау керде. 2016 елда Россия Федерациясе Президенты Указы белән ведомстводан тыш сак Россия Федерациясе Милли гвардиясе гаскәрләренең федераль хезмәте структурасына кертелде. Бу Татарстан Республикасы буенча Росгвардия идарәсендә иң күп санлы хезмәтләрнең берсе, аның составына республикабызның барлык шәһәрләрендә һәм эре торак пунктларында уңышлы эшләүче 29 бүлекчә керә.

Алексеевск районы буенча ведомстводан тыш сак бүлеге җитәкчесе, полиция майоры Айдар Гатин билгеләп үткәнчә, Росгвардия хезмәткәрләре дәүләт әһәмиятендәге объектларның һәм гражданнар күпләп җыела торган урыннарның террорчылыкка каршы яклануын тәэмин итәләр. Килешү нигезендә физик һәм юридик затларның мөлкәтен саклауны гамәлгә ашыралар. Мәдәни-массакүләм һәм спорт чаралары вакытында җәмәгать тәртибен күзәтәләр. Дислокация һәм патруль маршрутлары урыннарында җинаятьләрне һәм хокук бозуларны булдырмый калалар. Аеруча мөһим һәм режим объектларын саклау буенча эш алып баралар. Росгвардиянең үзәкләштерелгән күзәтү пультларына тоташтырылган объектларда сакчылык һәм хәвефле сигнализация эшләү турындагы хәбәрләргә оператив рәвештә җавап бирәләр. Алар арасында урлау, талау, кеше үтерү, автотранспорт урлау, сәламәтлеккә авыр зыян китерү, наркотикларның законсыз әйләнеше белән бәйле җинаятьләр бар. Шулай ук ведомстводан тыш сак хезмәткәрләре югалган балаларны табып, аларның әти-әниләренә кайтарган, янгын сүндерүчеләргә янгыннан кешеләрне чыгарышырга ярдәм күрсәткән, хөкем ителгән, федераль эзләүгә бирелгән гражданнарны тоткарлаган очраклар да еш очрый.

«Алексеевск районында безнең хезмәткәрләребез тәүлек буе объектларда патрульлек итә һәм аларны күзәтә. Полиция органнары белән бергә Алексеевск урамнарында тынычлык һәм тәртип тәэмин итәбез. Гамәлдәге хезмәткәрләрне һәм ветераннарны чын күңелдән һөнәри бәйрәмебез белән котлыйсым һәм аларга рәхмәтемне җиткерәсем килә. Нык сәламәтлек һәм иминлек телим», - диде Айдар Хәйдәр улы.