Заря
  • Рус Тат
  • Чисталык белән тәрбияләү

    15 апрельдә республика санитария-эпидемиология һәм халыкның экологик куркынычсызлыгы икеайлыгы старт алды.

    Газета укучы рәсемнәрдә күрә торган хәлләр бистәбезгә хас нәрсә түгел. Икеайлык башланганчы ук күп кенә алексеевскилы - үз өйләре тирәсендә, ә предприятиеләр һәм оешмалар беркетелгән территорияләрдә тәртип урнаштырдылар инде. Бистә болай чиста һәм матур күренә. Ләкин район үзәгенең күренешен боза торган нәрсәләр дә бар. Шуңа күрә район һәм бистә башлыгы Владимир Козонков тәртип саклаучыларны һәм хакимият структураларын куелган таләпләрне үтәмәүчеләргә карата иң катгый чараларны күрергә чакырды. "Вәкаләтләрегез бар, аларны кирәк урыннарда кулланырга кирәк", - диде киңәшмәләрнең берсендә Владимир Константинович.
    Икеайлык кысаларында билгеләнгән эшләрне үткәрү өчен оператив штаб булдырылды. Районда 9 майга кадәр урам юлларының чокыр-чакырлары ямалачак, 7000гә якын яшь үсенте утыртылачак. Санкцияләнмәгән чүплекләрне юк итү буенча зур эш башкарылачак.
    Төзекләндерү эшләренә, атап әйткәндә, кар сулары кайбер территорияләрне басып китмәсен өчен өстәмә су агызу торбалары кую кертелде. Шулай ук каты көнкүреш калдыкларын вакытлыча саклау өчен мәйданчыклар һәм контейнерлар ремонтланды, урамнардагы киртәләр төзәтелде һәм буялды һ.б.лар.
    Район кешеләре һәм кунаклар буш вакытларын үткәрә торган территорияләрне төзекләндерүгә килгәндә, биредә Кама елгасының пляж зонасында, күп кенә алексеевскилы җәй көне вакытын уздырырга ярата торган урында эшләр оештырылачак. Һәм, әлбәттә инде, чишмә буйларында тәртипне саклауга зур игътибар биреләчәк, ә алар безнең районда аз түгел.
    Экологик тәрбия бирү буенча район мәктәпләрендә авыл җирлекләре территорияләрендәге чишмәләргә укучыларның шефлык итүе оештырылачак. Балалар экологик тәрбия буенча стендлар, чәчәк түтәлләре ясаячаклар.
    Властьлар иң хәлиткеч карарлар кабул итәләр. Алар нәтиҗәле булырлармы? Һәркем түгел, ә бәлки күпчелек алексеевскилы тәртип урнаштыруга һәм аны саклауга үз өлешен керткән очракта булырлар. Безнең бистәне "Кама аръягы хәзинәсе" дип атыйлар. Кунакларга бездә булу ошый, без аларны кунакчыллыгыбыз һәм ачык күңеллелегебез белән җәлеп итәбез.

    Нравится
    Поделиться:
    Реклама
    Комментарии (0)
    Осталось символов: